6 თვეში ოჯახში ძალადობის შემთხვევები 2017 წლის მაჩვენებელს უტოლდება – შსს

2018 წლის პირველ ექვს თვეში გამოძიება დაიწყო ოჯახში დანაშაულის 2 804 ფაქტზე, აქედან  სისხლისსამართლებრივი დევნა – 1933 პირის მიმართ. 2018 წლის 6 თვის მონაცემი უტოლდება გასული მთლიანი წლის ჯამურ მაჩვენებელს.

შსს-ს ცნობით, მიმდინარე წლის 6 თვეში დაკავებულია 1 328 პირი.

რაც შეეხება შემაკავებელ ორდერებს, 2018 წლის 6 თვეში გამოცემული შემაკავებელი ორდერების რაოდენობა (3 292) ორჯერ აღემატება მთელი 2017 წლის მონაცემს. შსს-ს ცნობით, დაბალია შემაკავებელი ორდერის პირობების დარღვევის მაჩვენებელი, რაც მხოლოდ 7%-ს შეადგენს და ძირითადად გამოიხატება “მიახლოების აკრძალვის” დარღვევაში.

შინაგან საქმეთა მინისტრის მოადგილემ ნათია მეზვრიშვილმა დღეს, 10 ივლისს, გამართულ ბრიფინგზე ისაუბრა იმ საკანონმდებლო ცვლილებების შესახებ, რომლებიც  ამჟამად პარლამენტში განიხილება. კანონპროექტის მიხედვით:

  • მკაცრდება სასჯელი ოჯახში ძალადობაზე;
  •  გენდერული ნიშნით დანაშაულის ჩადენა დამამძიმებელი გარემოება ხდება ცალკეული დანაშაულებისთვის;
  • მკაცრდება სასჯელი ოჯახური დანაშაულის განმეორებით ჩადენისათვის;
  • შემაკავებელი და დამცავი ორდერის პირობების დარღვევისთვის გათვალისწინებულია პირდაპირ სისხლისსამართლებრივი პასუხისმგებლობა, ნაცვლად დღეს არსებული ადმინისტრაციული პასუხისმგებლობისა.

 

 

ნეტგაზეთის მასალების სხვა გამოცემებში გადაბეჭდვის წესი


ავტორი
ელენე ხაჭაპურიძე არის ნეტგაზეთის რეპორტიორი 2011 წლიდან. აშუქებს პოლიტიკის, განათლების, ჯანდაცვის, ადამიანის უფლებებს და მიმდინარე მოვლენებს. e-mail ellen.khachapuridze@gmail.com