ახალი ინიციატივა აშშ-ის საერთაშორისო განვითარების სააგენტოს (USAID) დაწყებითი განათლების პროექტის ფარგლებში განხორციელდება.
ოფიციალური ინფორმაციით, პროცესის სამიზნე ჯგუფს წარმოადგენს დაახლოებით 300 საჯარო და ეთნიკური უმცირესობის სკოლის დაწყებითი საფეხურის 1-6 კლასების ქართული ენის, ქართულის, როგორც მეორე ენისა, და მათემატიკის მასწავლებელი და დაწყებითი საფეხურის დაახლოებით 40 000 მოსწავლე საქართველოს ყველა რეგიონიდან.
“დაწყებითი განათლების 5-წლიანი პროექტი გააუმჯობესებს დაწყებითი კლასების მოსწავლეთა უნარებს კითხვასა და მათემატიკაში, მასწავლებლებისათვის სწავლების ახალი სტრატეგიების გაცნობის, ხარისხიანი საგანმანათლებლო რესურსების უზრუნველყოფისა და კითხვასა და მათემატიკაში საგნობრივი ექსპერტების კომპეტენციების გაზრდის გზით,”- აცხადებენ სამინისტროში.
პროექტმა, სამინისტროს ინფორმაციით, უკვე დაიწყო პილოტირების პროცესი 122 საპილოტე სკოლაში, სადაც მიმდინარეობს ტრენინგები 1200 დაწყებითი საფეხურის ქართული ენის, ქართულის, როგორც მეორე ენისა, და მათემატიკის მასწავლებლებისათვის.
სამინისტროში აცხადებენ, რომ 2016 წელს პროექტის დასრულებისათვის ქართველი მოსწავლეებისათვის მისაწვდომი იქნება მრავალფეროვანი რესურსები, ისინი მიიღებენ მხარდაჭერას კითხვასა და მათემატიკაში, რაც მათ დაეხმარება აქტიურად ჩაერთონ სწავლის პროცესში და დაეუფლონ მაღალ სააზროვნო უნარებსა და ცოდნას.
