სახელმწიფო უსაფრთხოების სამსახურის ინფორმაციით, ქრთამის აღების ბრალდებით შეიარაღებული ძალების გენერალური შტაბის სამხედრო პოლიციის დეპარტამენტის მონიტორინგის მთავარი სამმართველოს განყოფილების უფროსი და „საქართველოს ომისა და სამხედრო ძალების ვეტერანთა და მეომართა ვაზიანის კავშირი“-ს ხელმძღვანელი დააკავეს.
სუს-ში აცხადებენ, რომ დაკავებულები თავდაცვის სამინისტროს ყოფილი თანამშრომლის შვილს თელავში, სამხედრო ქალაქის დასახლებაში მდებარე საცხოვრებელი ფართის საკუთრებაში გადაცემას დაპირდნენ. უწყების თანახმად, საცხოვრებლის გადაცემის სანაცვლოდ, მათ პირს 4000 ლარის გადახდა მოსთხოვეს.
სუს-ის ინფორმაციით, გამოძიება ქრთამის აღების ფაქტზე სსკ-ის 338-ე მუხლის 1-ლი ნაწილით მიმდინარეობს, რაც თავისუფლების აღკვეთას 6-დან 9 წლამდე ვადით ითვალისწინებს.