ახალი ამბები

მეტრო ვარკეთილში ჭერის ჩამონგრევის საქმეზე ბრალი სამ პირს წაუყენეს

22 ივნისი, 2018 • 1958
მეტრო ვარკეთილში ჭერის ჩამონგრევის საქმეზე ბრალი სამ პირს წაუყენეს

საქართველოს პროკურატურის ცნობით, მეტროსადგურ „ვარკეთილში“ განხორციელებული უხარისხო სარემონტო სამუშაოების შესრულების საქმეზე ბრალი სამ პირს წაუყენეს. თუმცა პროკურატურამ ბრალდებულებისთვის აღკვეთი ღონისძიების სახით არა წინასწარი პატიმრობა, არამედ თითოეულისთვის 50 000 ლარის ოდენობით გირაოს შეფარდების შუამდგომლობით მიმართა სასამართლოს.

გულგრილობის, უსაფრთხოების მოთხოვნებთან შეუსაბამო, უხარისხო სამუშაოს შესრულებისა და ყალბი ოფიციალური დოკუმენტის დამზადება- გამოყენების ფაქტზე ბრალდებულები არიან  შპს „გეომეფის“ აღმასრულებელ დირექტორი,  შპს „ყვარელრემმშენის“ მენეჯერი და შპს „ყვარელრემმშენის“ მთავარი ინჟინერი.

როგორც პროკურატურა აცხადებს, გამოძიებით დადგინდა, რომ 2015 წლის 13 ოქტომბერს, მეტროსადგურ „ვარკეთილის“ სარემონტო-სარეაბილიტაციო სამუშაოების პროექტის მომზადების მიზნით, შპს „თბილისის სატრანსპორტო კომპანიის“ მიერ გამოცხადებულ ელექტრონულ ტენდერში გამარჯვებული კომპანიის, შპს „გეომეფის“ აღმასრულებელმა დირექტორმა  გ.კ-მ ტენდერში მისი კომპანიის მონაწილეობის მიღებისა  და მატერიალური სარგებლის მიღების მიზნით, შპს „თბილისის სატრანსპორტო კომპანიაში“ წარადგინა მის მიერვე გაყალბებული და სარემონტო სამუშაოების უხარისხო  პროექტი. 

პროკურატურის განცხადების მიხედვით, აღნიშნული პროექტით გათვალისწინებული სარემონტო-სარეაბილიტაციო სამუშაოების შესრულებისთვის შპს „თბილისის სატრანსპორტო კომპანიის“ მიერ 2016 წლის 28 სექტემბერს გამოცხადებულ ელექტრონულ ტენდერში  შპს ,,ყვარელრემმშენმა“ გაიმარჯვა და მეტროსადგურ „ვარკეთილის“ სარემონტო-სარეაბილიტაციო სამუშაოები შეასრულა.  სარეაბილიტაციო სამუშაოების წარმოების პროცესში, შპს „გეომეფს“ წარმოეშვა ვალდებულება, შეემოწმებინა მეტროსადგურ „ვარკეთილის“ ქვედა ვესტიბიულში ჭერზე არსებული ანკერების მზიდუნარიანობა და გაეცა შესაბამისი საექსპერტო დასკვნა. აღნიშნულის გამო სარეაბილიტაციო სამუშაოები დროებით შეჩერდა. 2017 წლის 19 აპრილს გ..-მ ყალბი კონსტრუქციული დასკვნა შეადგინა, რომელსაც პროექტის კონსტრუქტორის ნაცვლად  თვითონ მოაწერა ხელი, შემდეგ კი აღნიშნული დასკვნა  „თბილისის სარტრანსპორტო კომპანიის“ სამშენებლო სამსახურში წარადგინა. აღნიშნულის საფუძველზე, შპს „ყვარელრემმშენმა’’ განაახლა სამუშაოების შესრულება.  შპს „გეომეფის“ ხელმძღვანელმა გ.კ-მ, ხელშეკრულებით დაკისრებული ვალდებულებების მიუხედავად,  არაჯეროვნად შეასრულა თავისი სამსახურებრივი მოვალეობა და არ გაუწია პროექტს სათანადო საავტორო ზედამხედველობა. მის მიერვე შედგა მომხმარებლის სიცოცხლის და ჯანმრთელობის უსაფრთხოების მოთხოვნებთან შეუსაბამო სარემონტო-სარეაბილიტაციო დაგეგმარების პროექტი და ასევე კონსტრუქციული დასკვნა, სადაც არ იქნა გათვალისწინებული ჭერზე უარყოფითი ფაქტორებით გამოწვეული დამატებითი დატვირთვები – მატარებლის მოძრაობით, სავენტილაციო ჰაერის მიმოქცევით გამოწვეული ქარის წნევა და სხვა.

პროკურატურისვე განცხადებით, გამოძიებით ასევე დადგინდა, რომ  შპს „ყვარელრემმშენის“ მენეჯერმა გ.რ-მ არაჯეროვნად შეასრულა სამსახურებრივი მოვალეობა და არ აწარმოა შესრულებული სამუშაოების ხარისხის კონტროლი. ამავდროულად, გ.რ-სა და შპს „ყვარელრემმშენის“ მთავარი ინჟინრის. ზ.ყ-ს მონაწილეობით და პასუხისმგებლობით, მეტროსადგურ „ვარკეთილში“ შეკიდული ჭერის მოწყობითი სამუშაოები შპს ,,ყვარელრემმშენის“ მიერ განხორციელდა პროექტის გარეშე და ამავე დროს უხარისხოდ, რის გამოც 2018 წლის 30 იანვარს, დილით, თბილისში, მეტროსადგურ „ვარკეთილის” ქვედა ვესტიბიულში ჭერი ჩამოინგრა და  მეტროს ვესტიბიულში მყოფ 18 მოქალაქეს დაეცა, რომელთაგანაც ჯანმრთელობის დაზიანება 11 პირს მიადგა, ხოლო სახელმწიფომ მიიღო მატერიალური ზიანი.

გ.კ-ს ბრალდება საქართველოს სისხლის სამართლის კოდექსის 362-ე მუხლის მე-2 ნაწილის „ბ“ ქვეპუნქტით, (ორი ეპიზოდი) 2201-ე მუხლის მე-2 ნაწილითა და 251-ე მუხლის მე-2  ნაწილით, გ.რ-ს 2201-ე  მუხლის მე-2 ნაწილით და 251-ე მუხლის მე-2 ნაწილით  ხოლო ზ. ყ-ს  251-ე მუხლის მე-2 ნაწილით, (2201 –  გულგრილობა, ესე იგი ორგანიზაციაში ხელმძღვანელობითი უფლებამოსილების მქონე პირის მიერ თავის სამსახურებრივი მოვალეობის არაჯეროვნად შესრულება მისდამი დაუდევარი დამოკიდებულების გამო, რამაც გამოიწვია მძიმე შედეგი. 251 – უსაფრთხოების მოთხოვნებთან შეუსაბამო, უხარისხო სამუშაოს შესრულება, რაც არ შეესაბამება მომხმარებლის სიცოცხლის და ჯანმრთელობის უსაფრთხოების მოთხოვნებს, რამაც ადამიანების ჯანმრთელობის დაზიანება გამოიწვია. 362 – ყალბი ოფიციალური დოკუმენტის დამზადება და გამოყენება, რამაც მნიშვნელოვანი ზიანი გამოიწვია) წარედგინა.

სისხლის სამართლის საქმეზე გრძელდება გამოძიება. ბრალდებულებისთვის წარდგენილი ბრალდება სასჯელის სახედ და ზომად ორიდან ხუთ წლამდე თავისუფლების აღკვეთას ითვალისწინებს.

ამასთანავე, მოცემული სისხლის სამართლის საქმიდან ცალკე წარმოებად გამოყოფილია სისხლის სამართლის საქმე, შპს „თბილისის სატრანსპორტო კომპანიის“ თანამშრომელთა მხრიდან სამსახურეობრივი გულგრილობის ფაქტზე,  საქართველოს სისხლის სამართლის კოდექსის 342-ე მუხლის პირველი ნაწილით.

მასალების გადაბეჭდვის წესი