კობახიძე: პრემიერი ეკონომისტის გამოცდილებით არსებული გუნდიდან უნდა დასახელდეს

საქართველოს პარლამენტის თავმჯდომარის, ირაკლი კობახიძის განცხადებით, სასურველია პრემიერ-მინისტრობის კანდიდატი არსებული გუნდიდან დასახელდეს და მას ეკონომიკური გამოცდილება ჰქონდეს.

“კრიტერიუმებს რაც შეეხება, ლოგიკური იქნება მსჯელობა არსებული გუნდიდან პრემიერ-მინისტრობის კანდიდატის დასახელებაზე. ლოგიკურია ისიც, რომ კანდიდატს ეკონომიკური გამოცდილება ჰქონდეს. ესეც იქნება კრიტერიუმები, ყოველ შემთხვევაში ამ კრიტერიუმებით ვიხელმძღვანელებდი”, – განაცხადა ირაკლი კობახიძემ.

პარლამენტის თავმჯდომარის განცხადებით, დღეს, 14 ივნისს, 17:00 საათზე შეიკრიბება მმართველი გუნდი, საპარლამენტო უმრავლესობა გაფართოებულ ფორმატში, და დღესვე დაასახელებენ პრემიერ-მინისტრობის კანდიდატს.

რაც შეეხება საკითხს, ვინ შევა ახალ მთავრობაში, ამის შესახებ კობახიძემ არაფერი თქვა.

“ეს არ არის ჩვენი პრეროგატივა, პირველ რიგში, ეს არის პრემიერ-მინისტრობის კანდიდატის პრეროგატივა, როდესაც დასახელდება პრემიერ-მინისტრობის კანდიდატი, ის შემოგვთავაზებს მთავრობის ახალ შემადგენლობას. ამის შემდეგ შეიძლება ჩაერთოს პარლამენტი ამ დისკუსიაში და განხილვაში, დავუტოვოთ ეს კონსტიტუციური უფლება პრემიერ-მინისტრობის კანდიდატს, რომელიც ასახელებს მთავრობის ახალ შემადგენლობას”, – განაცხადა ირაკლი კპობახიძემ.

გუშინ, 13 ივნისს, საქართველოს პრემიერ-მინისტრი გიორგი კვირიკაშვილი გადადგა, მან გამოსამშვიდობებელ ბრიფინგზე აღნიშნა, რომ პარტიის ლიდერს, ბიძინა ივანიშილს უნდა მისცეს შესაძლებლობა, რომ ახალი მთავრობა დააკომპლექტოს.

ნეტგაზეთის მასალების სხვა გამოცემებში გადაბეჭდვის წესი


ავტორი
მიშა მეფარიშვილი არის ნეტგაზეთის რეპორტიორი 2010 წლიდან. აშუქებს კულტურის პოლიტიკის, ადამიანის უფლებების საკითხებს და სხვა მიმდინარე თემებს. Email: mishameparishvili@gmail.com