ახალი ამბები

ყაზბეგისკენ მიმავალი გზა გადაკეტილი იყო, სავარაუდოდ პარაპლანით მფრინავების დაკავების გამო

10 ივნისი, 2018 • 4336
ყაზბეგისკენ მიმავალი გზა გადაკეტილი იყო, სავარაუდოდ პარაპლანით მფრინავების დაკავების გამო

ერთი საათის განმავლობაში გადაკეტილი იყო მცხეთა-სტეფანმწინდა-ლარსის საავტომობილო გზა.

შინაგან საქმეთა სამინისტროს ცნობები ჯერ არ გაუვრცელებია, თუმცა “რეგინფოს” ცნობით, ამის მიზეზი ქართველი პარაპლანით მფრინავების დაკავება გახდა, რომლის გამოც ადგილობრივებმა გზა გადაკეტეს. 

შინაგან საქმეთა სამინისტრომ გუშინ გუდაურში მომხდარ ინციდენტზე განცხადება დღეს გაავრცელა, თუმცა არ უთქვამს დაკავებულების შესახებ. შსს აცხადებდა, რომ მიმდინარეობდა საგამოძიებო მოქმედებები დამნაშავე პირების იდენტიფიცირების მიზნით. 

8 ივნისს შინაგან საქმეთა სამინისტრომ   გუდაურში საქართველოსა და უკრაინის რესპუბლიკის მოქალაქეებს შორის მომხდარ კონფლიქტის ფაქტზე გამოძიება საქართველოს სისხლის სამართლის კოდექსის 126-ე მუხლით დაიწყო, რაც ძალადობას გულისხმობს.

“შინაგან საქმეთა სამინისტროს მცხეთა-მთიანეთის პოლიციის დეპარტამენტში შემოვიდა შეტყობინება, რომ ქართველ პარაპლანით მფრინავებსა და უკრაინის მოქალაქეებს შორის, რომლებსაც დაბა გუდაურის ახლოს იჯარით აქვთ აღებული პარაპლანით დაშვების ადგილები, კონფლიქტი მოხდა, რა დროსაც ქართველმა მფრინავებმა უკრაინის მოქალაქეებს სიტყვიერი და ფიზიკური შეურაცხყოფა მიაყენეს.

სამართალდამცველები შემთხვევის ადგილას ოპერატიულად გამოცხადდნენ. დაპირისპირება პოლიციელების მისვლის შემდეგაც გაგრძელდა, თუმცა მათ მალევე შეძლეს კონფლიქტის განმუხტვა.

გამოძიების პირველ ეტაპზე დადგინდა, რომ ქართველი პარაპლანით მფრინავები შემთხვევით უკრაინის მოქალაქეების მიერ იჯარით აღებულ ტერიტორიაზე დაეშვნენ, რასაც უკრაინელების უკმაყოფილება და მხარეთა შორის კონფლიქტი მოჰყვა.

მიმდინარე გამოძიების ფარგლებში, პოლიციამ შემთხვევის ადგილი დაათვალიერა და სამივე დაზარალებული გამოკითხა. ასევე, ტარდება ყველა შესაბამისი ექსპერტიზა.

აღნიშნული კონფლიქტის მეორე დღეს, ქართველმა მფრინავებმა დაბა გუდაურში პარაპლანით საფრენ ტერიტორიაზე მისასვლელი გზაზე მოძრაობა შეაფერხეს და რუსეთის ფედერაციის მოქალაქეებს – პარაპლანისტებს გადაადგილების საშუალება არ მისცეს, რის გამოც მათ შორის კონფლიქტი მოხდა. დაპირისპირების შედეგად, ქართველმა პარაპლანით მფრინავებმა რუსეთის მოქალაქეებს: სერგეი დემენტიევს და ფეოდორ ჩელიშევს სიტყვიერი და ფიზიკური შეურაცხყოფა მიაყენეს და ავტომანქანები დაუზიანეს.

კონფლიქტის დროს დაშავებული ფეოდორ ჩელიშევი ამ დროისთვის თბილისის ერთ-ერთ სამედიცინო დაწესებულებაში მკურნალობს. მის სიცოცხლეს საფრთხე არ ემუქრება.

გამოძიების ფარგლებში, გამოიკითხა კონფლიქტში მონაწილე რუსეთის ორივე მოქალაქე, დანიშნულია შესაბამისი ექსპერტიზები. ამ დროისთვის მიმდინარეობს ინტენსიური საგამოძიებო ღონისძიებები დანაშაულის ჩამდენი პირების იდენტიფიცირების მიზნით”, -ნათქვამია შსს-ს 10 ივნისს გავრცელებულ განცხადებაში. 

ამ თემაზე დამატებით ინფორმაციას “ნეტგაზეთი”  შსს-დან მისი მიღებისთანავე დაუყოვნებლივ მოგაწვდით.

ვითარება მცხეთა-სტეფანწმინდის გზა ფოტო: reginfo.ge

მასალების გადაბეჭდვის წესი