საკრებულოს დარბაზში რუსულ კომპანიას თავისი პროდუქტის რეკლამირების უფლება მისცეს

ბათუმის საკრებულოს  სხდომათა დარბაზში რუსული პროდუქტის პრეზენტაციის შესახებ ინფორმაცია ბათუმის წინა მოწვევის საკრებულოს წევრმა, თენგიზ აფხაზავამ სოციალურ ქსელში გაავრცელა.

„ბათუმის საკრებულოს სხდომათა დარბაზში, აჭარის ექიმთა საზოგადოების თავმჯდომარის, რამაზ სურმანიძის ხელშეწყობით, ჩატარდა კონფერენცია თემაზე “ჯანმრთელი მომავალი”, რომელსაც უძღვებოდა ნატურალური ბიოპროდუქტების მწარმოებელი ბრენდი კორპორაცია “სიბირსკოე ზდოროვიეს” წარმომადგენელი ალლა პავლოვა და თბილისის ოფისის ხელმძღვანელი, კონსტანტინე სულამანიძე. განიხილეს მსოფლიო ტენდენციები ჯანსაღი ბიოპროდუქტების გამოყენებასთან მიმართებაში და წარმოადგინეს კორპორაციის უნიკალური პროდუქცია. მისი შეძენა შეგიძლიათ ბათუმის ოფისში, რომელიც დროებით განთავსდა მისამართზე ლერმონტოვის…“ – წერდა თენგიზ აფხაზავა საკუთარი ფეისბუქის გვერდზე.

წინა მოწვევის საკრებულოს წევრმა ეს სტატუსის მას შემდეგ წაშალა, რაც „ბათუმელები“ დაინტერესდა, რის საფუძველზე და ვისი გადაწყვეტილებით დაუთმეს საკრებულოს სხდომათა დარბაზი რუსულ კომპანიას.

მართალია, სოციალურ ქსელში გამოქვეყნებული ფოტოებით დასტურდება, რომ საკრებულოში პროდუქტი ჰქონდათ მიტანილი, თუმცა არ ვიცით, გაყიდეს თუ არა ის ადგილზე.

იმის გასარკვევად, თუ ვინ გადაწყვეტა საკრებულოს დარბაზი დაეთმოთ რუსული კომპანიისთვის, თავისი პროდუქტის პრეზენტაცია რომ გაემართა, საკრებულოს თავმჯდომარის მოვალეობის შემსრულებელს, თამაზ სალუქვაძეს დავუკავშირდით [საკრებულოს თავმჯდომარე მივლინებაში იმყოფება]. თავდაპირველად მან გვითხრა, რომ ასეთი ინფორმაცია არ აქვს: „გავარკვევ და დაგირეკავთ.“ მოგვიანებით კი განმარტა, რომ შეხვედრა საკრებულოს დარბაზში არასამუშაო საათებში შედგა, თვითონ კი იმ დროს თავის სამაჟორიტარო უბანში იმყოფებოდა და ამიტომაც ეს შემთხვევა კონტროლს მიღმა დარჩა.

თამაზ სალუქვაძე: „… როგორც მე გადმომცა ბატონმა აფხაზავამ, რომელიც იყო ამ შეხვედრის ორგანიზატორი, ეს არ იყო სარეკლამო შეხვედრა, ეს იყო, უბრალოდ, პრეზენტაცია. თავმჯდომარე რომ დაბრუნდება, გავარკვევთ დეტალებში რა იყო და როგორ იყო. როგორც თქვენ მეუბნებით, რომ პროდუქტი იყო იქ მიტანილი, ასეთივე ინფორმაციით, რასაც თქვენგან ვფლობ, ასეთივე მწირი და მშრალი ინფორმაცია გამაჩნია, რომ ეს ასე არ ყოფილა. ანუ ვის დავეყრდნო ახლა, უხერხულია ჩემთვის ამაზე საუბარი, ვინმეს დადანაშაულება ტყუილში ჩემთვის უხერხულია.“

საკრებულოს თავმჯდომარის მოადგილე [ამ ეტაპზე თავმჯდომარის მოვალეობის შემსრულებელი] ასევე ამბობს, რომ მისთვის მიუღებელია საკრებულოს დარბაზის რუსული პროდუქტის რეკლამისთვის გამოყენება. მისი თქმით, მომავალში დარბაზის გამოყენების საკითხს უმკაცრესად გააკონტროლებენ: „რაზეც თქვენ მეუბნებით, ის ფორმა, რა თქმა უნდა, ჩემთვის და ნებისმიერი ადამიანისთვის მიუღებელია.“

მოგვიანებით „ბათუმელებს“ თავისი ინიციატივით დაუკავშირდა თენგიზ აფხაზავა. მან განმარტა, რომ სხდომათა დარბაზი შეხვედრისთვის საკრებულოს თავად სთხოვა, შეხვედრის მიზანი არ ყოფილა პროდუქტის რეკლამირება და ექიმები ჯანმრთელობის საკითხებზე სასაუბროდ დაპატიჟეს, ამიტომაც თავს უხერხულად გრძნობს.

ის ამტკიცებს, რომ პროდუქტი აპრობირებულია ბევრ ქვეყანაში. აქვე დასძენს, რომ ეს შეხვედრა საზოგადოებამ არ უნდა გაიგოს, როგორც რუსული პროდუქტის რეკლამისთვის დაგეგმილი შეხვერდა.

ნეტგაზეთის მასალების სხვა გამოცემებში გადაბეჭდვის წესი


ავტორი