საპარლამენტო უმრავლესობის წევრი შოთა ხაბარელი იზიარებს მოსაზრებას იმის შესახებ, რომ დავით ქევხიშვილი ძიუდოს ფედერაციის პრეზიდენტის თანამდებობიდან უნდა გადადგეს. მისი თქმით, ძუდოს ნაკრებში წარმატებული მწვრთნელები მუშაობდნენ, რომლებიც გადააყენეს და “არაკომპეტენტური სპეციალისტები” დანიშნეს.

“ბიჭები ზუსტად ამას აპროტესტებდნენ. წარმატებული მწვრთნელების გადაყენებამ მოიტანა ზუსტად ეს შედეგი. აქედან გამომდინარე, ვისი ბრალეულობაც გამოიკვეთა, იმაზე ფიქრობენ, რომ პრეზიდენტი უნდა გადადგეს. მეც ვფიქრობ, რომ პრეზიდენტმა არასწორი გადაწყვეტილება მიიღო იმით, რომ მან წარმატებული მწვთნელები გადააყენა და თავისი მეგობრები მოიყვანა. ეს არის ყველაზე მტკივნეული. როდესაც ასეთი კაზუსი ხდება და მისი შემოქმედი პრეზიდენტია, ის უნდა გადადგეს”, – ამბობს ხაბარელი.

ძიუდოისტებმა, რომლებიც ძიუდოს ფედერაციის პრეზიდენტის გადადგომას ითხოვენ, დავით ქევხიშვილის კაბინეტის კარი აჭედეს. მათი თქმით, ქევხიშვილის სამუშაო ადგილზე შეშვებას არ აპირებენ და მის დაუყოვნებლივ გადადგომას მოითხოვენ. ძიუდოისტებმა ფედერაციის პრეზიდენტის ოთახიდან სიმბოლურად გამოიტანეს სავარძელიც.

როგორც ძიუდოს ახალგაზრდული ნაკრების ძიუდოისტმა, გიორგი გველესიანმა “ნეტგაზეთს” განუცხადა, ძიუდოისტები იძულებულნი გახდნენ, აღნიშნული ზომებისათვის მიემართათ, რადგან ახლად შექმნილმა კომისიას მათი მოთხოვნები ვერ დააკმაყოფილა.

“იქიდან გამომდინარე, რომ სპეციალურმა კომისიამ ჩვენი მოთხოვნები ვერ დააკმაყოფილა, მივმართეთ უკიდურეს ზომებს და შევიკრიბეთ იმისთვის, რომ დავით ქევხიშვილმა ვეღარ მიაღწიოს თავის კუთვნილ სკამს. როგორც ის ამბობს, ეს მისი ფედერაციაა, თუმცა ეს ასე არ არის: ფედერაცია ეკუთვნით სპორტსმენებს. გვინდა დავამტკიცოთ, რომ მართლები ვართ და ამ სიმართლეს გავიტანთ ბოლომდე.

…ჩვენ არ ვეხებით იმას, რაც ჩვენი კომპეტენცია არ არის. არ გვაინტერესებს, რა დარღვევები აქვს უშუალოდ მას. ჩვენ, როგორც სპორტსმენებს, გვაქვს არაერთი პრობლემა”, – აღნიშნა გიორგი გველესიანმა.

დავით ქევხიშვილის გადადგომის მოთხოვნა ქართველმა ძიუდოისტებმა 4 მარტს გაახმიანეს და პროტესტის ნიშნად ვარჯიში შეწყვიტეს. სპორტსმენები ამბობდენ, რომ ნაცვლად იმისა, ივარჯიშონ მშვიდ გარემოში, მუდიმივად სტრესის ქვეშ უწევთ ყოფნა. მათი თქმით, ეს ყველაფერი უკავშირდება დავით ქევხიშვილის ერთპიროვნულ მმართველობასა და ფედერაციაში დაგროვილ პრობლემებს.

მანამდე, ევროპის ჩემპიონატის უმედლოდ დასრულების შემდეგ, იგივე მოითხოვა ვეტერანმა ძიუდოისტმა ზურაბ ზვიადაურმაც. კითხვაზე, ხომ არ არის პროცესები ზვიადაურისგან მართული, ძიუდოისტი ვარლამ ლიპარტელიანი აღნიშნავდა, რომ ასე არ არის, ვინაიდან დარწმუნებულია, რომ ზვიადაურს თანამდებობის დაკავების ინტერესი არ აქვს და თუ ეს ასე მოხდება, თავად წავა ნაკრებიდან.

საპასუხოდ, ქევხიშვილი “რუსთავი2”-თან საუბრისას აცხადებდა, რომ „უსაფუძვლო ბრალდებების გამო რაღაც ნაბიჯებს უკან ვერ გადადგამს“. ფედერაციის ხელმძღვანელი მიიჩნევს, რომ მისი მოწინააღმდეგებისგან დღემდე ვერ მოისმინა არგუმენტი, თუ რატომ უნდა გადადგეს.