შინაგან საქმეთა მინისტრის, გიორგი გახარიას განცხადებით, “გაგებით ეკიდება” კრიმინალის გაზრდილ რაოდენობას. შინაგან საქმეთა მინისტრს გაზრდილ კრიმინალთან დაკავშირებით ბიძინა ივანიშვილის განცხადება საპარლამენტო უმცირესობის წევრმა, გიგა ბოკერიამ შეახსენა.
“რატომ ვსაუბრობ მე, რომ გაგებით ვეკიდები? სისტემა გახდა ჰუმანური, რაც არის პირველადი მიღწევა, რაც არის კონცეპტუალური მიღწევა, მაგრამ სისტემა ვერ გახდა მოკლე დროში შესაბამისად ეფექტური. აი, ამ დისბალანსმა ჰუმანურობის გაზრდასა და ეფექტურობის ვერდაწევას შორის გამოიწვია ის, რასაც თქვენ ეძახით კრიმინალის ზრდას და შემდგომ აბსოლუტურ პოლიტიკურ კონტექსტში ამბობთ, რომ ამას “გაგებით მოეკიდეთ”. მე ამას ასე ვუყურებ და ვთვლი, რომ ეს არაა ობიექტური რეალობა. აქ არაფერი გასაკვირი არ არის, სისტემის სწრაფ ჰუმანიზაციას ეფექტურობა ვერ დაეწია და მივიღეთ ის, რაც მივიღეთ”. – განაცხადა გახარიამ პარლამენტში დეპუტატების შეკითხვებზე პასუხის გაცემისას.
2012 წლის ნოემბერში გამართულ პრესკონფერენციაზე ჟურნალისტის კითხვას, რა გარანტიას აძლევს პრემიერ-მინისტრი საზოგადოებას, რომ დაგეგმილი მასშტაბური ამნისტიის შედეგად კრიმინალი არ მოიმატებს, ბიძინა ივანიშვილმა უპასუხა, რომ გარკვეული დოზით კრიმინალი ქვეყანაში გაიზრდება.
“ეს რაღაც ეტაპზე გარკვეული დრო გაზრდის კრიმინალს. საზოგადოება ამას გაგებით უნდა მოეკიდოს, უნდა გავიჭირვოთ. იქ ძალიან ბევრი და უმრავლესობა იმსახურებს ამას, ვიღაცები გამოგვეპარებიან, ვიღაცებს უკან შებრუნება მოუწევს, საზოგადოებამ უნდა გადავიტანოთ ეს. რაღაც უხერხულობებს ეს შექმნის ალბათ. მაგრამ არსებობენ ორგანოები და ალბათ შესატყვის რეაგირებას გააკეთებენ,”- განაცხადა ივანიშვილმა.