თბილისში, რუსთაველის გამზირზე, სადაც ძირითადი აქცია და მისი კონტრაქცია იმართება, წყლის ჭავლის მანქანები და სპეცრაზმი გამოჩნდა. რუსთაველის გამზირის ორივე მხარეს შეკრებილნი არიან ნაციონალისტური ორგანიზაციების წარმომადგენლები, რომლებიც ცდილობენ პარლამენტის წინ შეკრებილებთან მისვლას. მათი მხრიდან ისმის ძალადობრივი მოწოდებები. ნაციონალისტები ძირითადი აქციის მონაწილეებს დაშლისკენ მოუწოდებენ.

ამ წუთებში პარლამენტის მიმდებარე ტერიტორია პოლიციის მიერ სრულად ბლოკირებულია, რათა კონტრაქციის მონაწილეებმა ვერ შეძლონ იმ ადამიანებთან მიახლოება, რომლებიც მეორე დღეა დედაქალაქის ცენტრში ძალადობისა და მკაცრი ნარკოპოლიტიკის წინააღმდეგ აქციას  მართავენ.

პრემიერმინისტრმა გიორგი კვირიკაშვილმა პოლიციას ნებისმიერი დაპირისპირების თავიდან ასაცილებლად მაქსიმალური მობილიზებისკენ მოუწოდა. ორდღიანი დუმილის შემდეგ გამართულ ბრიფინგზე მთავრობის მეთაურმა არაფერი თქვა მისი გადადგომის მოთხოვნასა და იმ კითხვებზე, რაც მის მიმართ, აქციის მონაწილეების გარდა, ჟურნალისტებსაც ჰქონდათ.

მოვლენათა ქრონოლოგია

• სამართალდამცავებმა სპეცოპერაცია “გალერისა” და “ბასიანში” 12 მაისს, შუაღამისას, დაახლოებით პირველ საათზე, ერთდროულად დაიწყეს;
• როგორც შსს ამბობს, ნარკოტიკების რეალიზაციის ბრალდებით 8 პირი დააკავეს, თუმცა ოპერაციის პარალელურად პოლიციამ კლუბების მიმდებარედ შეკრებილი ათეულობით ადამიანი დააკავა;
• სპეცოპერაციის წინააღმდეგ პროტესტი პარლამენტთან გაგრძელდა. ათეულობით პოლიციელმა დემონსტრანტებს აქციის თავისუფლად ჩატარების უფლება არც აქ მისცა და ადამიანების დაკავება რუსთაველის გამზირზეც გააგრძელა;
• დაკავებულთა შორის იყვნენ “თეთრი ხმაურის მოძრაობის” წევრი ბექა წიქარიშვილი და “გირჩის” პრეზიდენტობის კანდიდატი ზურაბ ჯაფარიძე.
• პოლიციამ ადმინისტრაციული წესით დაკავებული ყველა პირი დილით ხელწერილით გაათავისუფლა. უცნობია, როდის განიხილავს ამ პირებზე შედგენილი ადმინისტრაციული სამართალდარღვევების საქმეებს სასამართლო.
• შსს-მ 12 მაისს გამართულ ბრიფინგზე თქვა, რომ ნარკორეალიზაციის ბრალდებით დაკავებულთა წინააღმდეგ მოსამართლის განჩინების საფუძველზე ჩაწერილი ვიდეომტკიცებეულები აქვს.
• 12 მაისის შუადღის სამი საათიდან გვიან ღამემდე პარლამენტთან მიმდინარეობდა აქცია-კონცერტი სახელწოდებით “ჩვენი თავისუფლებისთვის”. აქციის მონაწილეები ითხოვენ პრემიერისა და შინაგან საქმეთა მინისტრის გადადგომას, ასევე, რეპრესიული ნარკოპოლიტიკის შეცვლას.
• სახალხო დამცველმა ნინო ლომჯარიამ თქვა, რომ ნარკორეალიზებაში ბრალდებულები კლუბებში სპეცოპერაციამდე რამდენიმე საათით ადრე დააკავეს და მათი დაკავების ადგილი რომელიმე კლუბი არ ყოფილა;
• ნარკორეალიზაციაში ბრალდებულთა ადვოკატები ამბობენ, რომ მათ ხელი გაუთქმელობაზე მოაწერინეს და შესაბამისად, საქმის დეტალებზე ვერ ისაუბრებენ. ერთი-ერთი ადვოკატის თქმით კი, რვავე ბრალდებულის წინააღმდეგ ჩვენებას ერთი მოწმე აძლევს და ყველა შემთხვევაში საუბარია ერთი და იგივე ნივთიერების გასაღებაზე.