აქციის მონაწილეებმა 9 აპრილის მემორიალი ყვავილებით შეამკეს

იმ დამიანებმა, რომლებიც უკვე მეორე დღეა თბილისის ცენტრში აქციას მართავენ მკაცრი ნარკოპოლიტიკის შეცვლის მოთხოვნითა და ძალადობის წინააღმდეგ, დღეს, 13 მაისს, პარლამენტის წინ მდებარე 9 აპრილის მემორიალი ყვავილებით შეამკეს.

აღნიშნულს წინ უძღოდა საზოგადოების ნაწილის გაღიზიანება გუშინ მომხდარი ფაქტის გამო, როდესაც ერთმა აქტივისტმა მემორიალზე იცეკვა.

“ცეკვა არ შეიძლება იყოს შეურაცხმყოფელი”, – ასე პასუხობს აქციის მონაწილე ვახუშტი ბაგრატიონი საზოგადოების ნაწილს. მისივე თქმით, იმის დასტურად, რომ ისინი პატივს სცემენ 9 აპრილის გმირებსა და მათ მონაპოვარს, მათ მემროიალთან ყვავილები მიიტანეს.

აქციის ერთ-ერთმა მონაწილე ბექა წიქარიშვილმა საზოგადოების იმ ნაწილს, ვინც ცეკვის გამო თავი შეურაცხყოფილად იგრძნო, ბოდიში მოუხადა. მისი თქმით, ეს არ ყოფილა მიზანმიმართული აქტი.

აქციის მონაწილეები პარლამენტის მიმდებარე ტერიტორიაზე უკვე იკრიბებიან. მათი მოთხოვნები უცვლელია. ჯეჯერობით, მეორე დღეა დუმილს ინარჩუნებს საქართველოს პრემიერი გიორგი კვირიკაშვილი. რუსთაველზე მიმდინარე აქციის მოთხოვნების ერთ-ერთი მთავარი ადრესატი სწორედ ის არის. ისინი სამართალდამცავებს მოუწოდებენ, პასუხი აგებინონ თავიანთ რიგებში არსებულ მსხვილ ნარკოლეარიზატორებს და მხოლოდ ქვედა რგოლის გამსაღებლების დაკავებით არ დაკმაყოფილდნენ.


  • სამართალდამცავებმა სპეცოპერაცია “გალერისა” და “ბასიანში” 12 მაისს, შუაღამისას, დაახლოებით პირველ საათზე, ერთდროულად დაიწყეს;
  • როგორც შსს ამბობს, ნარკოტიკების რეალიზაციის ბრალდებით 8 პირი დააკავეს, თუმცა ოპერაციის პარალელურად პოლიციამ კლუბების მიმდებარედ შეკრებილი ათეულობით ადამიანი დააკავა;
  • სპეცოპერაციის წინააღმდეგ პროტესტი პარლამენტთან გაგრძელდა. ათეულობით პოლიციელმა დემონსტრანტებს აქციის თავისუფლად ჩატარების უფლება არც აქ მისცა და ადამიანების დაკავება რუსთაველის გამზირზეც გააგრძელა;
  • დაკავებულთა შორის იყვნენ “თეთრი ხმაურის მოძრაობის” წევრი ბექა წიქარიშვილი და “გირჩის” პრეზიდენტობის კანდიდატი ზურაბ ჯაფარიძე.
  • პოლიციამ ადმინისტრაციული წესით დაკავებული ყველა პირი დილით ხელწერილით გაათავისუფლა. უცნობია, როდის განიხილავს ამ პირებზე შედგენილი ადმინისტრაციული სამართალდარღვევების საქმეებს სასამართლო.
  • შსს-მ 12 მაისს გამართულ ბრიფინგზე თქვა, რომ ნარკორეალიზაციის ბრალდებით დაკავებულთა წინააღმდეგ მოსამართლის განჩინების საფუძველზე ჩაწერილი ვიდეომტკიცებეულები აქვს.
  • 12 მაისის შუადღის სამი საათიდან გვიან ღამემდე პარლამენტთან მიმდინარეობდა აქცია-კონცერტი სახელწოდებით “ჩვენი თავისუფლებისთვის”. აქციის მონაწილეები ითხოვენ პრემიერისა და შინაგან საქმეთა მინისტრის გადადგომას, ასევე, რეპრესიული ნარკოპოლიტიკის შეცვლას.
  • სახალხო დამცველმა ნინო ლომჯარიამ თქვა, რომ ნარკორეალიზებაში ბრალდებულები კლუბებში სპეცოპერაციამდე რამდენიმე საათით ადრე დააკავეს და მათი დაკავების ადგილი რომელიმე კლუბი არ ყოფილა;
  • ნარკორეალიზაციაში ბრალდებულთა ადვოკატები ამბობენ, რომ მათ ხელი გაუთქმელობაზე მოაწერინეს და შესაბამისად, საქმის დეტალებზე ვერ ისაუბრებენ. ერთი-ერთი ადვოკატის თქმით კი, რვავე ბრალდებულის წინააღმდეგ ჩვენებას ერთი მოწმე აძლევს და ყველა შემთხვევაში საუბარია ერთი და იგივე ნივთიერების გასაღებაზე.
ნეტგაზეთის მასალების სხვა გამოცემებში გადაბეჭდვის წესი


ავტორი
თაზო კუპრეიშვილი არის "ნეტგაზეთის" რედაქტორი 2018 წლის პირველი თებერვლიდან.