ახალი ამბები

ნიუ-იორკში სოლიდარობის აქცია გაიმართება – “ჩვენი თავისუფლებისთვის”

13 მაისი, 2018 • 2974
ნიუ-იორკში სოლიდარობის აქცია გაიმართება – “ჩვენი თავისუფლებისთვის”

ნიუ-იორკში თბილისის პარლამენტთან შეკრებილი დემონსტრანტების მხარდასაჭერად ხვალ, 13 მაისს სოლიდარობის აქცია გაიმართება. აქციის ორგანიზატორების თქმით, თუ თბილისში შეკრებილი დემონსტრანტები პარლამენტთან ცეკვავენ – ნიუ-იორკში შეკრებილები მათ ბრუკლინიდან შეუერთდებიან.

“როგორც მოგეხსენებათ, 11 მაისს თბილისში სპეცრაზმმა რეიდი მოაწყო თბილისის რამდენიმე ღამის კლუბში და გამოიყენა არაპროპორციული ძალა. რეიდი მოხდა 8 ადამიანის დასაჭერად, რომელსაც 3 თვეა უთვალთვალებენ. აღნიშნული ნიშნავს მხოლოდ იმას, რომ მიზანი რეიდის იყო თავდასხმა კლუბური ცხოვრების წესსა და თავისუფლებაზე, ძალის უმიზნო დემონსტრირება და ამიტომ სოლიდარობის ნიშნად ჩვენ ვცეკვავთ ბრუკლინში თავისუფლებისთვის.

ვისაც სურვილი და შესაძლებლობა გექნებათ, შემოგვიერდით ხვალ, 2 საათიდან ქვემოთ მითითებულ მისამართზე. ხვალ ცნობილი Day Party – Tiki Disco-ს ორგანიზატორებმა ნება დაგვრთეს, რომ ბანერებით შევიდეთ. ივენთის ბილეთების ბმული ნახეთ ქვემოთ (10$) სამწუხაროდ, ბილეთის გარეშე შესვლა ვერ მოხერხდება. ვიცი, ბევრს უნდოდა გარეთ შეკრება, მაგრამ ეს ნებართვის მიღებასთან არის დაკავშირებული, რისი მოსწრებაც ვერ ხერხდება. ჩვენები პარლამენტთან ცეკვავდნენ – ჩვენ ბრუკლინიდან შევუერთდეთ,”- ნათქვამია აქციის აღწერაში.

სოლიდარობის აქცია, გარდა ნიუ-იორკისა, ხვალ ბერლინშიც გაიმართება.

რაც შეეხება თბილისის აქციას, მონაწილეების მთავარი მოთხოვანაა, დასჯაზე ორიენტირებული ნარკოპოლიტიკა შეიცვალოს, ასევე,  12 მაისს თბილისის ღამის კლუბებში ჩატარებული სპეცოპერაციების გამო პრემიერმა და შინაგან საქმეთა მინისტრმა თანამდებობა დატოვონ.


  • სამართალდამცავებმა სპეცოპერაცია “გალერისა” და “ბასიანში” 12 მაისს, შუაღამისას, დაახლოებით პირველ საათზე, ერთდროულად დაიწყეს;
  • როგორც შსს ამბობს, ნარკოტიკების რეალიზაციის ბრალდებით 8 პირი დააკავეს, თუმცა ოპერაციის პარალელურად პოლიციამ კლუბების მიმდებარედ შეკრებილი ათეულობით ადამიანი დააკავა;
  • სპეცოპერაციის წინააღმდეგ პროტესტი პარლამენტთან გაგრძელდა. ათეულობით პოლიციელმა დემონსტრანტებს აქციის თავისუფლად ჩატარების უფლება არც აქ მისცა და ადამიანების დაკავება რუსთაველის გამზირზეც გააგრძელა;
  • დაკავებულთა შორის იყვნენ “თეთრი ხმაურის მოძრაობის” წევრი ბექა წიქარიშვილი და “გირჩის” პრეზიდენტობის კანდიდატი ზურაბ ჯაფარიძე.
  • პოლიციამ ადმინისტრაციული წესით დაკავებული ყველა პირი დილით ხელწერილით გაათავისუფლა. უცნობია, როდის განიხილავს ამ პირებზე შედგენილი ადმინისტრაციული სამართალდარღვევების საქმეებს სასამართლო.
  • შსს-მ 12 მაისს გამართულ ბრიფინგზე თქვა, რომ ნარკორეალიზაციის ბრალდებით დაკავებულთა წინააღმდეგ მოსამართლის განჩინების საფუძველზე ჩაწერილი ვიდეომტკიცებეულები აქვს.
  • 12 მაისის შუადღის სამი საათიდან უწყვეტად გრძელდება აქცია სახელწოდებით “ჩვენი თავისუფლებისთვის”. აქციის მონაწილეები ითხოვენ პრემიერისა და შინაგან საქმეთა მინისტრის გადადგომას;
  • სახალხო დამცველმა ნინო ლომჯარიამ თქვა, რომ ნარკორეალიზებაში ბრალდებულები კლუბებში სპეცოპერაციამდე რამდენიმე საათით ადრე დააკავეს და მათი დაკავების ადგილი რომელიმე კლუბი არ ყოფილა

მასალების გადაბეჭდვის წესი