კალაძე: მიმდინარეობს სპეკულირება, რომ ეს არის დარტყმა ღამის ეკონომიკაზე, რასაც არ ვეთანხმები

თბილისის მერი კახა კალაძე არ ეთანხმება მოსაზრებას, რომ 12 მაისს თბილსიის კლუბებში ჩატარებული სპეცოპერაცია არის დარტყმა კლუბურ ცხოვრებასა და ღამის ეკონომიკაზე. თითქმის 20-საათიანი დუმილის შემდეგ, ქალაქის მერმა ამის შესახებ ქართული ოცნების ოფისში ისაუბრა.

“ვისმენ არაერთგვაროვან განცხადებებს და მიმდინარეობს სპეკულირება, რომ ეს არის დარტყმა ღამის ეკონომიკაზე, ღამის ეკონომიკის განვითარებაზე, რაშიც ნამდვილად ევრ დავეთანხმები.  საუბარია, რომ ეს არის დარტყმა კლუბურ მუსიკაზე და მის მომავალ განვითარებაზე. აქ ნამდვილად ვერ დავეთანხმები ამ ადამიანებს. კიდევ ერთხელ, სრული პასუხისმგებლობით ვაცხადებ, რომ ღამის ეკონომიკა კიდევ უფრო განვითარდება და კლუბური სცენა, რომელიც არის ერთ-ერთი ყველაზე წარმატებული, აუცილებლად გაგრძელდება და ჩვენი მხრიდან იქმნება მაქსიმალური თანადგომა. ჩვენ ვამაყობთ იმ წარმატებებით, რაც ამ მიმართულებით გააჩნია დედაქალაქს “, – თქვა კახა კალაძემ.

თბილისის მერის თქმით, “ერთად უნდა ვებრძოლოთ ნარკორეალიზატორებს”:

“ეს ყველაფერი სერიოზულად ურტყამს თუნდაც კლუბურ მუსიკას, იმ კონკრეტულ ახალგაზრდებს, ჩვენ გვიკვდება შვილები, ჩვენ გვიკვდება ძმები, დები, ჩვენი თანამოქალაქეები. მე დარწმუნებული ვარ, რომ ის ახალგაზრდები, რომლებიც დღეს პარლამენტის წინ გამოსულები არიან და მართავენ აქციას, დაგვიდგებიან გვერდით”.

როგორც კალაძე ამბობს, არსებული ნარკოპოლიტიკა მისაღები არავისთვის არ არის და შესაცვლელია. ის ახალგაზრდებს იდეების გაცვლას სთავაზობს.

თბილსისი მერის თქმით, სპეცოპერაციის ჩატარების ფორმაზე მსჯელობა შეიძლება, თუმცა ნარკორეალიზატორებთან ბრძოლა უნდა გაგრძელდეს.


  • სამართალდამცავებმა სპეცოპერაცია “გალერისა” და “ბასიანში” 12 მაისს, შუაღამისას, დაახლოებით პირველ საათზე, ერთდროულად დაიწყეს;
  • როგორც შსს ამბობს, ნარკოტიკების რეალიზაციის ბრალდებით 8 პირი დააკავეს, თუმცა ოპერაციის პარალელურად პოლიციამ კლუბების მიმდებარედ შეკრებილი ათეულობით ადამიანი დააკავა;
  • სპეცოპერაციის წინააღმდეგ პროტესტი პარლამენტთან გაგრძელდა. ათეულობით პოლიციელმა დემონსტრანტებს აქციის თავისუფლად ჩატარების უფლება არც აქ მისცა და ადამიანების დაკავება რუსთაველის გამზირზეც გააგრძელა;
  • დაკავებულთა შორის იყვნენ “თეთრი ხმაურის მოძრაობის” წევრი ბექა წიქარიშვილი და “გირჩის” პრეზიდენტობის კანდიდატი ზურაბ ჯაფარიძე.
  • პოლიციამ ადმინისტრაციული წესით დაკავებული ყველა პირი დილით ხელწერილით გაათავისუფლა. უცნობია, როდის განიხილავს ამ პირებზე შედგენილი ადმინისტრაციული სამართალდარღვევების საქმეებს სასამართლო.
  • შსს-მ 12 მაისს გამართულ ბრიფინგზე თქვა, რომ ნარკორეალიზაციის ბრალდებით დაკავებულთა წინააღმდეგ მოსამართლის განჩინების საფუძველზე ჩაწერილი ვიდეომტკიცებეულები აქვს.
  • 12 მაისის შუადღის სამი საათიდან უწყვეტად გრძელდება აქცია სახელწოდებით “ჩვენი თავისუფლებისთვის”. აქციის მონაწილეები ითხოვენ პრემიერისა და შინაგან საქმეთა მინისტრის გადადგომას;
  • სახალხო დამცველმა ნინო ლომჯარიამ თქვა, რომ ნარკორეალიზებაში ბრალდებულები კლუბებში სპეცოპერაციამდე რამდენიმე საათით ადრე დააკავეს და მათი დაკავების ადგილი რომელიმე კლუბი არ ყოფილა.
ნეტგაზეთის მასალების სხვა გამოცემებში გადაბეჭდვის წესი


ავტორი
თაზო კუპრეიშვილი არის "ნეტგაზეთის" რედაქტორი 2018 წლის პირველი თებერვლიდან.