დუმილი – კვირიკაშვილი და კალაძე ამ დრომდე არ საუბრობენ კლუბებში სპეცრაზმის შეჭრაზე

თითქმის 18 საათი გავიდა მას შემდეგ, რაც თბილისის ღამის კლუბებში სპეცრაზმი შეიჭრა, რასაც დღეს მრავალათასიანი აქცია მოჰყვა, თუმცა პრემიერი კვირკაშვილი და დედაქალაქის მერი კალაძე ამ დრომდე სდუმან.

“ნეტგაზეთს” ორივე მაღალჩინოსნის პრესსამსახურებში განუცხადეს, რომ მათ საჯარო განცხადება ჯერ დაგეგმილი არ აქვთ და თუ მსგავსი რამ დაიგეგმა, შეგვატყობინებენ.

“ჩვენი თავისუფლებისთვის” – ათასობით მოქალაქე თბილისსა და ბათუმში ამ ლოზუნგით მართავს აქციებს. ისინი 12 მაისს, გამთენიისას, თბილისის ღამის კლუბებში სპეცრაზმის შეჭრისა და გამოვლენილი სისასტიკის გამო პრემიერ-მინისტრისა და შინაგან საქმეთა მინისტრის გადადგომას ითხოვენ. გარდა ამისა, მოქალაქეები მოითხოვენ ნარკოპოლიტიკის ლიბერალიზებასა და პოლიციური რეჟიმის შემსუბუქებას. თბილისში, რუსთაველის გამზირზე, სადაც ათასობით ადამიანია შეკრებილი, მობილიზებულია ასეულობით სამართალდამცავიც.

აქციის მონაწილეები მიიჩნევენ, რომ სამართალდამცავთა მიერ კლუბების რეიდის მიზანი არა ნარკოდანაშაულთან ბრძოლა, არამედ ძალის დემონსტრირება და მოქალაქეთა დაშინება იყო.


  • სამართალდამცავებმა სპეცოპერაცია “გალერისა” და “ბასიანში” 12 მაისს, შუაღამისას, დაახლოებით პირველ საათზე, ერთდროულად დაიწყეს;
  • როგორც შსს ამბობს, ნარკოტიკების რეალიზაციის ბრალდებით 8 პირი დააკავეს, თუმცა ოპერაციის პარალელურად პოლიციამ კლუბების მიმდებარედ შეკრებილი ათეულობით ადამიანი დააკავა;
  • სპეცოპერაციის წინააღმდეგ პროტესტი პარლამენტთან გაგრძელდა. ათეულობით პოლიციელმა დემონსტრანტებს აქციის თავისუფლად ჩატარების უფლება არც აქ მისცა და ადამიანების დაკავება რუსთაველის გამზირზეც გააგრძელა;
  • დაკავებულთა შორის იყვნენ “თეთრი ხმაურის მოძრაობის” წევრი ბექა წიქარიშვილი და “გირჩის” პრეზიდენტობის კანდიდატი ზურაბ ჯაფარიძე.
  • პოლიციამ ადმინისტრაციული წესით დაკავებული ყველა პირი დილით ხელწერილით გაათავისუფლა. უცნობია, როდის განიხილავს ამ პირებზე შედგენილი ადმინისტრაციული სამართალდარღვევების საქმეებს სასამართლო.
  • შსს-მ 12 მაისს გამართულ ბრიფინგზე თქვა, რომ ნარკორეალიზაციის ბრალდებით დაკავებულთა წინააღმდეგ მოსამართლის განჩინების საფუძველზე ჩაწერილი ვიდეომტკიცებეულები აქვს.
ნეტგაზეთის მასალების სხვა გამოცემებში გადაბეჭდვის წესი


ავტორი
თაზო კუპრეიშვილი არის "ნეტგაზეთის" რედაქტორი 2018 წლის პირველი თებერვლიდან.