ხმაურიანი დაპირისპირება პარლამენტში ბორჯომის საკრებულოს საკითხზე [ვიდეო]

პარლამენტში რეგიონული პოლიტიკისა და თვითმმართველობის კომიტეტის სხდომაზე მმართველ გუნდსა და საპარლამენტო ოპოზიციას შორის დაპირისპირება მოხდა. კომიტეტის სხდომაზე ოპოზიციას სურდა ბორჯომის საკრებულოში გუშინ განვითარებული მოვლენების შეფასება და განცხადების მიღება, ევროპული საქართველოს წარმომადგენლები დეპუტატების ბორჯომში ჩასვლის ინიციატივითაც გამოდიოდნენ.

აღნიშული საკითხები კომიტეტის დღის წესრიგში ვერ მოხვდა და “ქართული ოცნების” წარმომადგენელმა ზაზა გაბუნიამ განაცხადა, რომ მზად იყო გაემართა კონსულტაციები კომიტეტის სხდომის დასრულების შემდეგ. ამ განცხადების შემდგომ ოპოზიციის წარმომადგენლებმა კომიტეტის სხდომა დატოვეს.

პოლიტიკოსები სხდომაზე ერთმანეთს სიტყვიერადაც დაუპირისპირდნენ.

ბორჯომის საკრებულოს დეპუტატებსა და მოქალაქეებს საკრებულოს შენობაში სამართალდამცავები ამ დრომდე არ უშვებენ. ინფორმაცია “ნეტგაზეთს” შინაგან საქმეთა სამინისტროში მიაწოდეს.

როგორც უწყება განმარტავს, პოლიციელების მხრიდან მოქალაქეებისა და დეპუტატების არშეშვება მათივე უსაფრთხოების დაცვის მიზნით ხდება და “პოლიციის შესახებ” კანონის 25-ე მუხლს ეფუძნება. ამ მუხლით, პოლიციის წარმომადგენელი უფლებამოსილია პირს მოსთხოვოს გარკვეული ადგილის განსაზღვრული დროით დატოვება, ან აუკრძალოს კონკრეტულ ტერიტორიაზე შესვლა, თუ ეს აუცილებელია საფრთხის თავიდან ასაცილებლად.

“სამხრეთის კარიბჭის” ინფორმაციით, პოლიციელებმა შენობაში არც საკრებულოს თავმჯდომარე, ზაზა ჩაჩანიძე შეუშვეს, რომელიც მიიჩნევს, რომ მსგავსი ქმედება პოლიციის მხრიდან უკანონოა.

“კანონს უნდა იცავდნენ და ამ შემთხვევაში არღვევენ. ახსნა–განმარტებასაც არ იძლევიან. რაც შეეხება ოქმებს, სანამ ვერ შევალ მე შენობაში, ვერაფერზე ვისაუბრებ”, – განუცხადა მედიას ჩაჩანიძემ.

როგორც “ნეტგაზეთს” შინაგან საქმეთა სამინისტროში უთხრეს, ამ დროისთვის შენობაში იმყოფებიან ადმინისტრაციის, შემოსავლებისა და განათლების რესურსცენტრის თანამშრომლები. უწყების თქმითვე, პოლიცია აღნიშნულ თანამშრომლებს შენობის დატოვებისკენ არ მოუწოდებს.

გუშინ, 28 თებერვალს, ბორჯომში საკრებულოს სხდომა გაიმართა, რომელიც ხმაურისა და ფიზიკური დაპირისპირების ფონზე მიმდინარეობდა. საკრებულოს მერიის თანამშრომლების საშტატო ნუსხა და სახელფასო ანაზღაურება უნდა დაემტკიცებინა. რამდენიმეთვიანი ბოიკოტის შემდეგ, სხდომაზე მმართველი გუნდის, „ქართული ოცნების“ 11 დეპუტატიც შევიდა. თუმცა, მიუხედავად ამ წარმომადგენლობითი დასწრებისა, ხელფასების საკითხი ვერც 28 თებერვალს გადაწყდა. 26 დეპუტატიდან საკითხის დამტკიცებას მხარი მხოლოდ “ქართული ოცნების” 11-მა დეპუტატმა დაუჭირა, 15 ოპოზიციონერი დეპუტატის უარის გამო საკითხი ჩავარდა, რასაც ხმაური მოჰყვა. დეპუტატები ერთმანეთს სიტყვიერად და ფიზიკურად დაუპირისპირდნენ.

“სამხრეთის კარიბჭე” წერს, რომ სხდომის დასრულების შემდეგ მერიის თანამშრომელთა ნაწილმა სავარძლებით ჩახერგა საკრებულოს თავმჯდომარის კაბინეტის შესასვლელი კარი და ამბობდნენ, რომ იქამდე არ გაათავისუფლებენ შესასვლელს, ვიდრე საკრებულო ხელფასების საკითხს არ გადაწყვეტს. თანამშრომელთა მეორე ნაწილმა კი მერიის შენობის წინ გამართა აქცია. ბორჯომის მერიაში მუშაობა პარალიზებული იყო.

მოგვიანებით, ბორჯომში “ნაციონალური მოძრაობის” წევრი ნიკა მელიაც ჩავიდა. მისი თქმით, ის საკრებულოს თავმჯდომარის, “პატრიოტთა ალიანსის” წევრის, ზაზა ჩაჩანიძის მხარდასაჭერად ჩავიდა. მელიას გამოჩენას ფიზიკური დაპირისპირება მოჰყვა.

გვიან ღამით, 14-საათანი არეულობის შემდეგ, საკრებულოს თავმჯდომარემ ზაზა ჩაჩანიძემ ჟურნალისტებთან საუბრისას განაცხადა, რომ საღამოს ჩატარებული სხდომა, სადაც ხელფასების საკითხი განიხილეს, არალეგიტიმურია და ამ საკითხე ერთი კვირის შემდეგ განმეორებით იმსჯელებენ.

“სამხრეთის კარიბჭის” ინფორმაციით, ამ წლისთვის მერიაში თანამშრომელთა ხელფასები ასე განსაზღვრეს: მუნიციპალიტეტის მერი – 3450 ლარი; პირველი მოადგილე – 2 400 ლარი; მერის მოადგილე – 2 300 ლარი და სამსახურების უფროსები – 2000-2000 ლარი. საკრებულოს ოპოზიციონერი დეპუტატები, რომლებიც ბორჯომში უმრავლესობას ქმნიან, ხელფასების გაზრდილ ოდენობებს მხარს არ უჭერენ, რის გამოც ხელფასების საკითხი ვერ მტკიცდება და თვითმმართველობის 125 თანამშრომელს დღემდე არ აუღია იანვრის ხელფასი. ბორჯომის საკრებულოში უმრავლესობა არა “ქართულ ოცნებას”, არამედ ოპოზიციურ პარტიებს აქვთ.

ნეტგაზეთის მასალების სხვა გამოცემებში გადაბეჭდვის წესი


ავტორი
დათო ქოქოშვილი არის ნეტგაზეთის რედაქტორი 2018 წლის 1 თებერვლიდან. მანამდე ის იყო ნეტგაზეთის რეპორტიორი 2013 წლიდან. Email: davit.qoqoshvili@gmail.com