“გადარჩენილიაო, გვითხრეს” – დოდო გუგეშაშვილის ოპერაცია დასრულდა

დაჭრილი დოდო გუგეშაშვილი საოპერაციოდან გამოიყვანეს და რეანიმაციულ განყოფილებაში მოათავსეს. ამის შესახებ ჟურნალისტებს გუგეშაშვილის ნათესავმა მამუკა ჩოქურმა განუცხადა.

გუგეშაშვილს ჭრილობა გულმკერდის არეში აქვს მიყენებული.

“გადარჩენილიაო, ასე გვითხრეს”, – ამბობს ჩოქური.

მამუკა ჩოქურისთვის უცნობია, ბოლო პერიოდში ჰქონდა თუ არა ვინმესთან გუგეშაშვილს კონფლიქტი: “რა კონფლიქტი უნდა ჰქონოდათ”. მან არც ის იცის, ემუქრებოდა თუ არა ამ უკანასკნელს ვინმე: “დოდოს ვინ უნდა დამუქრებოდა”.

“მკვლელი, სავარაუდოდ, იცნობდა ოჯახის წევრებს”, – ამის შესახებ დოდო გუგეშაშვილის საქმეზე შსს-ს წარმომადგენელმა მამუკა ჭელიძემ განაცხადა, რომელიც დღეს დანაშაულის ადგილზე იმყოფებოდა.

მან გამოძიების ინტერესებიდან გამომდინარე დანაშაულის მოტივსა და სხვა დეტალებზე ჟურნალისტებთან არ ისაუბრა.

ნეტგაზეთი ესაუბრა გუგეშაშვილის ერთ-ერთ მეზობელს, რომელიც ამბობს, რომ კივილის ხმაზე სადარბაზოში გამოვიდა და დასისხლიანებული გუგეშაშვილი დაინახა. ეს იმას ნიშნავს, რომ დაჭრის შემდეგ მან სახლის დატოვება მოახერხა. როგორც ირკვევა, სასწრაფოც ამ მეზობლის ოჯახის წევრმა გამოიძახა. მეზობელი ამბობს, რომ კივილამდე გუგეშაშვილის სახლიდან ხმაურის ხმა არ გაუგია. მისივე თქმით, შემთხვევა დაახლოებით 11 საათზე მოხდა.

დღეს მხედრიონის ყოფილი ლიდერი დოდო გუგეშაშვილი საკუთარ სახლში ჩაცხრილეს. მას კლინიკაში ოპერაცია უტარდება. შემთხვევის შედეგად მისი შვილი გრიგოლ გუგეშაშვილი დაიღუპა.

“დღეს მიღებული შეყტობინების საფუძველზე 1958 წელს დაბადებული დ.გ-ს და მის შვილს, 1985 წელს დაბადებულ გ.გ-ს, დიღმის მასივში, მათსავე საცოხვრებელ ბინაში, უცნობმა პირმა ცეცხლსასროლი იარაღიდან გასროლით ჭრილობები მიაყენა. გ.გ. შემთხვევის ადგილზე გარდაიცვალა, ხოლო დ.გ. გადაყვანილია სამედიცინო დაწესებულებაში. ამ დროისთვის შემთხვევის ადგილზე, მუშაობენ შინაგან საქმეთა სამინისტროს ექსპერტ-კრიმინალისტები და მიმდინარეობს აქტიური საგამოძიებო ღონისძიებები. გამოძიება განზრახ მკვლელობის და დამამძიმებელ გარემოებაში ჩადენილი განზრახ მკვლელობის მცდელობის ფაქტზე მიმდინარეობს სისხლის სამართლის კოდექსის 108-ე და 19-109-ე მუხლებით”, – აცხადებენ შსს-ში.

 

ნეტგაზეთის მასალების სხვა გამოცემებში გადაბეჭდვის წესი
ავტორი
დათო ქოქოშვილი არის ნეტგაზეთის რედაქტორი 2018 წლის 1 თებერვლიდან. მანამდე ის იყო ნეტგაზეთის რეპორტიორი 2013 წლიდან. Email: davit.qoqoshvili@gmail.com