დღეს, 31 იანვარს, სააპელაციო სასამართლოში დეკანოზ გიორგი მამალაძის საქმეზე სხდომა გაიმართება, სადაც დაცვის მხარე სასამართლოს სიტყვით მიმართავს.
სასამართლო პროცესი 14:00 საათზე დაიწყება. დეკანოზის ადვოკატმა გიორგი ფანცულაიამ “ნეტგაზეთთან” საუბრისას განაცხადა, რომ წინა სასამართლო პროცესებზე პროკურატურამ დაასრულა თავისი პოზიციის წარდგენა, სადაც ისინი ითხოვდნენ, რომ დაუმძიმდეს ბრალი დეკანოზს და ანგარებით მკვლელობის მცდელობის მუხლის მიხედვით, 16–20 წლამდე პატიმრობა მიუსაჯონ.
დღევანდელ სხდომაზე კი დაცვის მხარე შეეცდება დაასაბუთოს ის, თუ რატომაა დეკანოზი გიორგი მამალაძე უდანაშაულო. ადვოკატი გიორგი ფანცულაია ამბობს, რომ დეკანოზს არავის მკვლელობის მცდელობა არ ჰქონია, არც ანგარებით და არც ანგარების გარეშე.
დეკანოზი, რომელიც არ დადიოდა პროტესტის ნიშნად წინა სასამართლო პროცესებზე, დიდი ალბათობით დაესწრება სასამართლო სხდომას და სიტყვითაც მიმართავს სასამართლოს.
მოსამართელთა კოლეგიამ, რომელსაც ნათია ბარბაქაძე ხელმძღვანელობს, შესაძლოა დღეს გამოიტანოს გადაწყვეტილება. თუმცა ადვოკატი ფიქრობს, რომ მოსამართლე დღეს არ გამოაცხადებს განაჩენს.
“ნაკლებად მოსალოდნელია იმიტომ, რომ საქმის მოცულობიდან გამომდინარე დროს მოითხოვს განაჩენის გამოცხადებისთვის”, – ამბობს გიორგი ფანცულაია.
ფანცულაია ამბობს, რომ დაცვის მხარეს ორი ახალი გარემოება აქვს წარდგენილი. ერთია სახალხო დამცველის დასკვნა, რომელიც შეეხება საქალაქო სასამართლოში საქმის წარმოებას, სადაც აღნიშნულია, რომ სასამართლოს გადაწყვეტილებით არ აღსრულდა სამართალი.
მეორე ახალი გარემოება არის თსუ–ის სამართალმცოდნეობის პროფესორის, ნონა თოდუას სამართლებრივ–სამეცნიერო დასკვნა, სადაც საუბარია იმაზე, რომ გიორგი მამალაძის ჩანაწერები დანაშაულის ნიშნებს არ შეიცავს.
- დეკანოზ მამალაძეს თბილისის საქალაქო სასამართლომ 9 წლიანი პატიმრობა 2017 წლის 5 სექტემბერს მიუსაჯა. მას ბრალად პატრიარქ ილია მეორის მდივან–რეფერენტის მკვლელობის მცდელობა დაუმტკიცდა.
- დეკანოზი გიორგი მამალაძე საქართველოს პროკურატურამ 10 თებერვალს დააკავა თბილისის საერთაშორისო აეროპორტში, როდესაც ის ბერლინში მიემგზავრებოდა, სადაც საქართველოს მართლმადიდებელი ეკლესიის პატრიარქს, ილია მეორეს ოპერაცია უტარდებოდა. პროკურატურის ცნობით, დეკანოზის ბარგის ჩხრეკისას ამოიღეს ფარულად შენახული შხამიანი ნივთიერება -„ნატრიუმის ციანიდი“.
- პროკურატურის ცნობით, ამ საქმეზე გამოძიება 2017 წლის 2 თებერვალს დაიწყო ჟურნალისტ ირაკლი მამალაძის განცხადების საფუძველზე, რომელმაც მიმართა საქართველოს პროკურატურას და მიუთითა, რომ მისმა ნაცნობმა მამა გიორგი მამალაძემ სთხოვა სიცოცხლისთვის საშიში შხამიანი ნივთიერების – ციანიდის მოძიებაში დახმარება, რომლის გამოყენებითაც ამ უკანასკნელს, როგორც შეხვედრისას განმცხადებელმა გაარკვია, უნდა მოეხდინა მაღალი იერარქიის სასულიერო პირის სიცოცხლის ხელყოფა.
- მოგვიანებით პროკურატურამ განმარტა, რომ დეკანოზი გიორგი მამალაძე აპირებდა შორენა თეთრუაშვილის მკვლელობას.
- 2017 წლის 12 თებერვალს საქართველოს პროკურატურის შუამდგომლობის საფუძველზე თბილისის საქალაქო სასამართლოს განჩინებით გიორგი მამალაძეს აღკვეთის ღონისძიების სახით შეეფარდა პატიმრობა.
- მამალაძე თავდაპირველად ბრალდებული იყო საქართველოს სისხლის სამართლის კოდექსის 18-108-ე (მკვლელობის მომზადება) და 236-ე მუხლებით (ცეცხლასასროლი იარაღის უკანონო შეძენა-შენახვა), რაც სასჯელის სახედ და ზომად ითვალისწინებდა თავისუფლების აღკვეთას ვადით შვიდიდან თხუთმეტ წლამდე. მოგვიანებით, პროკურატურამ მამალაძეს ბრალი დაუმძიმა, კერძოდ, სსკ-ის 18, 109-ე მუხლის მე-3 ნაწილის „გ“ ქვეპუნქტით წარუდგინა ბრალდება (განზრახ მკვლელობის მომზადება ანგარებით), რაც სასჯელის სახედ და ზომად ითვალისწინებდა 16-დან 20 წლამდე თავისუფლების აღკვეთას.
- საბოლოოდ სასამართლომ ისევ გადააკვალიფიცირა მუხლი 18-108-ზე და სწორედ მკვლელობის მომზადებაში ცნო დეკანოზი დამნაშავედ.
- თავად დეკანოზი მამალაძე ბრალს არ აღიარებს, მისი თქმით, ციანიდის ყიდვა თავად შორენა თეთრუაშვილმა სთხოვა.
- დეკანოზ მამალაძის საქმის სასამართლო განხილვა დახურული იყო, ასევე, ადვოკატებს გაუთქმელობის ხელწერილზე აქვთ ხელი მოწერილი, რის გამოც საზოგადოებისთვის უცნობია საქმის მასალები.
