გორის რაიონულმა სასამართლომ განზრახ მვლელობაში, საბრძოლო მასალის მართლსაწინააღმდეგო შეძენასა და შენახვაში, პოლიციელის მიმართ წინააღმდეგობის გაწევაში ბრალდებულს პირს 10 წლით თავისუფლების აღკვეთა მიუსაჯა.
გამოძიების ცნობით, ბრალდებულმა გ. მ–მ 2017 წლის 6 მაისს გორის რაიონის სოფელ ქვახვრელში ურთიერთშელაპარაკების ნიადაგზე ა.მ-ს ფიზიკური შეურაცხყოფა მიაყენა, რითაც ა.მ-მ მსუბუქი ხარისხის დაზიანება მიიღო.
იმავე დღეს გ.მ. ასევე ურთიერთშელაპარაკების ნიადაგზე მ.ს-ს ფიზიკურად გაუსწორდა, იგი რამდენიმე წუთის განმავლობაში ძლიერად სცემდა დაზარალებულს, რამაც გულმკერდის დახურული ტრავმა და ნეკნების მოტეხილობა გამოიწვია, რასაც შედეგად მოჰყვა სიკვდილი, აცხადებს პროკურატურა.
სასამართლოში გამოკვლეული მტკიცებულებებით ასევე დადასტურდა, რომ გ.მ-მ პოლიციის თანამშრომლებს, რომლებიც მომხდარ ფაქტთან დაკავშირებით მის საცხოვრებელ სახლში საგამოძიებო მოქმედებების ჩასატარებლად მივიდნენ, ძალადობის გზით წინააღმდეგობა გაუწია და ჯანმრთელობის დაზიანებები მიაყენა.
პროკურატურის ინფორმაციით, გ.მ. 2017 წლის 6 მაისს გორის რაიონის სოფელ ქვახვრელში დააკავეს. მისი საცხოვრებელი სახლის ჩხრეკისას ამოიღეს 1290 ერთეული სხვადასხვა კალიბრის ვაზნა და ფეთქებადი ნივთიერება – საარტილერიო დენთი.
გ.მ.-ს ბრალდება სისხლის სამართლის კოდექსის 126-ე მუხლის პირველი ნაწილით (ძალადობა, ორი ეპიზოდი), 353-ე მუხლის პირველი ნაწილით (პოლიციის მუშაკის მიმართ წინააღმდეგობა ჩადენილი ძალადობით), 236-ე მუხლის მე-2 ნაწილით (საბრძოლო მასალისა და ფეთქებადი ნივთიერების მართლსაწინააღმდეგო შეძენა, შენახვა) და 108-ე მუხლით (განზრახ მკვლელობა) წარედგინა.
