გმირთა მოედანზე, ერთ-ერთ რესტორანთან, გუშინ, გვიან ღამით სამი პირი დაჭრეს, ამის შესახებ ინფორმაციას შინაგან საქმეთა სამინისტრო “ნეტგაზეთს” უდასტურებს.
უწყების ინფორმაციით, შემთხვევა გვიან ღამით მოხდა. გამოძიება მიმდინარეობს სსკ 120-ე მუხლით, რაც ჯანმრთელობის განზრახ მსუბუქ დაზიანებას გულისხმობს. ამ დროისთვის საქმეზე დაკავებულია ერთი პირი.
რაც შეეხება დაჭრილებს, სასწრაფომ ისინი სხვადასხვა საავადმყოფოში გადაიყვანა. მათ შორის ერთ-ერთი, რომელსაც ყველაზე მძიმე დაზიანებები აღენიშნებოდა – რესპუბლიკურ საავადმყოფოშია. როგორც აღნიშნულ კლინიკაში აცხადებენ, ამ დროისთვის დაშავებულის მდგომარეობა მძიმეა.
” პაციენტი ,დაახლოებით ,პირველის წუთებზე, გვიან ღამით, შემოიყვანეს კლინიკაში. აღენიშნებოდა ბასრი იარაღით მიყენებული ჭრილობები ქვემო კიდურის მიდამოში, სისხლის დიდი დანაკარგით. ჩაუტარდა გადაუდებელი ოპერაცია. ამჟამად მკურნალობას განაგრძობს რეანიმაციულ განყოფილებაში, მისი მდგომარეობა მძიმეა” – განუცხადა “ნეტგაზეთს” რესპუბლიკური საავადმყოფოს პრესსამსახურმა.