ავსტრიის სამინისტრომ “ნეტგაზეთს” დაუდასტურა, რომ მაჩალიკაშვილის მიღებაზე უარი თქვა

თემირლან მაჩალიკაშვილის ავსტრიაში გადაყვანას ქვეყნის შინაგან საქმეთა სამინისტრო არ დაეთანხმა. ამის შესახებ “ნეტგაზეთს” უწყების პრესსამსახურმა აცნობა.

“ტერორიზმში ეჭვმიტალის შემოსვლაზე ქვეყანაში შინაგან საქმეთა ფედერალური სამინისტროს თანხმობა არ გაიცა შიდა უშიშროების საფრთხის საფუძველზე”, – ასე უპასუხა სამინისტრომ “ნეტგაზეთის” კითხვას, შეესაბამებოდა თუ არა სიმართლეს ერთ-ერთი ავსტრიული ტაბლოიდის მიერ 11 იანვარს გავრცელებული ინფორმაცია იმის შესახებ, რომ მაჩალიკაშვილი ქვეყანაში სამინისტროს მოთხოვნის საფუძველზე არ გადაიყვანეს.

“ნეტგაზეთმა” უწყებას ასევე ჰკითხა, კონკრტულად რა სახის საფრთხეზე იყო საუბარი და თუ შედგა კომუნკაცია ორი ქვეყნის შინაგან საქმეთა სამინისტროებს შორის აღნიშნულთან დაკავშირებით, რაზეც სამინისტროს პრესსამსახურში არ უპასუხიათ.

გამოცემა “Kronen Zeitung”-მა ავსტრიის შინაგან საქმეთა მინისტრის, ჰერბერტ კიკლის კომენტარიც გამოაქვეყნა, რომელშიც მაჩალიკაშვილის ავსტრიაში გადაყვანის თანმდევ საფრთხეებზე საუბრობდა.

“ჩვენთვის ძალიან სარისკო იყო “ISIS”-ის ტერორისტობაში ეჭვმიტანილის ავსტრიაში შემოშვება. მისი მკურნალობა ვენაში დიდი საფრთხე იქნებოდა შიდა უსაფრთხოებისთვის”, – აღნიშნა მინისტრმა

პანკისში 26 დეკემბერს ჩატარებული სპეცოპერაციისას დაჭრილი თემირლან მაჩალიკაშვილი 10 იანვარს გარდაიცვალა. მანამდე მის მკურნალობაზე თანხმობა ერთ-ერთმა ავსტრიულმა კლინიკამ გამოთქვა, თუმცა შემდგომ გადაწყვეტილება შეცვალა.

თეირლან მაჩალიკაშვილი 10 იანვარს გარდაიცვალა. მას, ისევე როგორც სხვა დაკავებულებს, ბრალი ტერორიზმის დაფინანსებაში, ტერორისტული საქმიანობის სხვაგვარ მატერიალურ მხარდაჭერასა და რესურსებით უზრუნველყოფაში ედებოდა.

მოვლენათა ქრონოლოგია
  • 10 იანვარი: პანკისში სპეცოპერაციისას თავში დაჭრილი  თემირლან მაჩალიკაშვილი დილით გარდაიცვალა. ის 19 წლის იყო.
  • მაჩალიკაშვილის ოჯახის წევრები მუდივად ითხოვდნენ, რომ დაჭრილი გადაეყვანათ უცხოეთის კლინიკაში და შვილს უდანაშაულოდ მიიჩნევდნენ.
  • 26 დეკემბერი: თემირლან მაჩალიკაშვილის პანკისის ხეობაში ჩატარებული სპეცოპერაციის დროს საკუთარ სახლში, შუბლის არეში დაჭრეს;
  • უსაფრთხოების სამსახურის ინფორმაციით, მაჩალიკაშვილი დაკავების მომენტში სამართალდამცავებისთვის წინააღმდეგობის გაწევასა და ყუმბარის ამოქმედებას ცდილობდა. ვერსიას დაჭრილის ოჯახი კატეგორიულად უარყოფს და აცხადებს, რომ მას მძინარე მდგომარეობაში ესროლეს.
  • დაკავებულებს ბრალი ედებათ ტერორიზმის დაფინანსებაში, ტერორისტული საქმიანობის სხვაგვარ მატერიალურ მხარდაჭერასა და რესურსებით უზრუნველყოფაში.
  • სუს–ის ინფორმაციით, პანკისში სპეცოპერაციის დროს დაკავებული  პირები დაეხმარნენ ტერორისტებს ბინის და იარაღის მოძიებაში. მათ შორის ჩატაევს, რომელიც სამართალდამცველებმა თბილისში, გაბრიელ ბერის გამზირზე ჩატარებული სპეცოპერაციის დროს მოკლეს.
ნეტგაზეთის მასალების სხვა გამოცემებში გადაბეჭდვის წესი
ავტორი
მიხეილ გვაძაბია არის ნეტგაზეთის რეპორტიორი 2017 წლის სექტემბრიდან