მაჩალიკაშვილის დედა: თუ ცოცხალი ვიქნები, ამას არ შევარჩენ მათ, ვინც დამნაშავეები არიან

პანკისის სპეეცოპერაციისას დაჭრილი თემირლან მაჩალიკაშვილის დედა ამბობს, რომ აღნიშნულ საქმეზე სტრასბურგის სასამართლოშიც შეიტანს სარჩელს. თემირლან მაჩალიკაშვილი დღეს, 10 იანვარს, საავადმყოფოში გარდაიცვალა.

“გამორთეს აპარატიდან და მომიკლეს შვილი. მიზანმიმართულად არ გადაიყვანეს [სხვა ქვეყანაში]. ქვეყანა დაექცეს იმ სპეცრაზმელებს, ქვეყანა დაექცეს იმ გომელაურს და გახარიას. არ უნდოდათ იმათ ჩემი შვილის სიცოცხლე. თუ ცოცხალი ვიქნები, ამას სტრასბურგამდე მივიყვან, ამას არ შევარჩენ ამ ქვეყანას, ვინც დამნაშავეები არიან”,- ამბობს მედიკო მარგოშვილი, თემირლან მაჩალიკაშვილის დედა.

დღეს, 10 ინვარს საავადმყოფოში თემირლან მაჩალიკაშვილი გარდაიცვალა. იგი 26 დეკემბერს პანკისის ხეობაში ჩატარებული სპეცოპერაციის დროს თავის არეში დაჭრეს. მაჩალიკაშვილის ცხედარს სამხარაულის სახელობის ექსპერტიზის ბიუროში ექსპერტიზა უტარდება, რომელსაც ოჯახის მიერ დაქირავებული ექსპეერტი მაია ნიკოლაიშვილიც ესწრება. მაჩალიკაშვილის ოჯახის წევრები ითხოვდნენ, რომ დაჭრილი უცხოეთის კლინიკაში გადაეყვანათ:

მოვლენების ქრონოლოგია: 

  • 10 იანვარი: პანკისში სპეცოპერაციისას თავში დაჭრილი  თემირლან მაჩალიკაშვილი დილით გარდაიცვალა. ის 19 წლის იყო.
  • მაჩალიკაშვილის ოჯახის წევრები მუდივად ითხოვდნენ, რომ დაჭრილი გადაეყვანათ უცხოეთის კლინიკაში და შვილს უდანაშაულოდ მიიჩნევდნენ.
  • 26 დეკემბერი: თემირლან მაჩალიკაშვილის პანკისის ხეობაში ჩატარებული სპეცოპერაციის დროს საკუთარ სახლში, შუბლის არეში დაჭრეს;
  • უსაფრთხოების სამსახურის ინფორმაციით, მაჩალიკაშვილი დაკავების მომენტში სამართალდამცავებისთვის წინააღმდეგობის გაწევასა და ყუმბარის ამოქმედებას ცდილობდა. ვერსიას დაჭრილის ოჯახი კატეგორიულად უარყოფს და აცხადებს, რომ მას მძინარე მდგომარეობაში ესროლეს.
  • დაკავებულებს ბრალი ედებათ ტერორიზმის დაფინანსებაში, ტერორისტული საქმიანობის სხვაგვარ მატერიალურ მხარდაჭერასა და რესურსებით უზრუნველყოფაში.
  • სუს–ის ინფორმაციით, პანკისში სპეცოპერაციის დროს დაკავებული  პირები დაეხმარნენ ტერორისტებს ბინის და იარაღის მოძიებაში. მათ შორის ჩატაევს, რომელიც სამართალდამცველებმა თბილისში, გაბრიელ ბერის გამზირზე ჩატარებული სპეცოპერაციის დროს მოკლეს.
ნეტგაზეთის მასალების სხვა გამოცემებში გადაბეჭდვის წესი


ავტორი
ელენე ხაჭაპურიძე არის ნეტგაზეთის რეპორტიორი 2011 წლიდან. აშუქებს პოლიტიკის, განათლების, ჯანდაცვის, ადამიანის უფლებებს და მიმდინარე მოვლენებს. e-mail ellen.khachapuridze@gmail.com