მილორავა: დენის ტარიფის ზრდა დოლარის კურსს არ გამოუწვევია

სემეკის თავმჯდომარემ, ირინა მილორავამ განაცხადა, რომ დენის ტარიფის ზრდა იმ ინვესტიციებმა გამოიწვია, რომლებიც კომპანიებმა უნდა განახორციელონ მომდევნო სამი წლის განმავლობაში.

“ტარიფების ზრდა “თელასისა” და “ენერგო-პრო ჯორჯიასთვის” განაპირობა იმ უპრეცედენტოდ მაღალი მოცულობის ინვესტიციამ, რომელიც უნდა განხორციელდეს მომდევნო სამი წლის განმავლობაში. მოხმარება არის სერიოზულად გაზრდილი, 2020 წლისთვის დაახლოებით 20%-ით გაიზრდება კიდევ მოხმარება. ეს არის სერიოზული გამოწვევა სექტორისთვის. ინვესტიციები უნდა განხორციელდეს ორი მიმართულებით: უნდა გაძლიერდეს გადამცემი და გამანაწებელი ქსელი და აუცილებლად უნდა მოხდეს ახალი ელექტროსადგურების ქსელში ინტეგრაცია. მომდევნო სამ წელში განსახორციელებელი ინვესტიციის ჯამური რაოდენობა, გენერაციის ობიექტების ჩათვლით, აქ შედის მხოლოდ გენერაციის 8 ობიექტი, შეადგენს 1,2 მილიარდ ლარს. ძირითადად ამ ტარიფებში მოხდა ამ საინვესტიციო ვალდებულებების ასახვა”, – განაცხადა მილორავამ.

სემეკის თავმჯდომარის თქმით, 2015 წლისგან განსხვავებით, როდესაც ვალუტის კურსის ცვლილების გამო გაიზარდა ელექტროენერგიის სამომხმარებლო ტარიფები, წელს დოლარის კურსს გავლენა არ მოუხდენია ტარიფებზე.

ნეტგაზეთის მასალების სხვა გამოცემებში გადაბეჭდვის წესი


ავტორი
მიშა მეფარიშვილი არის ნეტგაზეთის რეპორტიორი 2010 წლიდან. აშუქებს კულტურის პოლიტიკის, ადამიანის უფლებების საკითხებს და სხვა მიმდინარე თემებს. Email: mishameparishvili@gmail.com