პარლამენტში ნიკა მელიას სიტყვით გამოსვლას ხმაური და დაპირისპირება მოჰყვა. საკუთარ სიტყვით გამოსვლაში დეპუტატი გუშინდელ ინციდენტზე საუბრობდა, რომლის დროსაც მას პრემიერ-მინისტრმა სიტყვიერი შეურაცხყოფა მიაყენა. ნიკა მელიას გამოსვლა პარლამენტში ხმაურის ფონზე მიმდინარეობდა:

“ვფიქრობდი, აქვს კი აზრი თქვენ მოგმართოთ მას შემდეგ, რაც გუშინ იკადრა თქვენი პოლიტიკური გუნდის ხელმძღვანელმა. მაგრამ გუშინდელი დღე არის არაფერი დღევანდელთან შედარებით. მთელმა “ქართული ოცნების” გუნდმა მხარი კი არ აუბით, უბრალოდ, წაახალისეთ ძალადობა და თქვენ ღირსების დაცვის ეგიდით, რეალურად, ახალი ბიძგი მიეცით დაპირისპირებას და ურთიერთქიშპობას ამ ქვეყანაში”  – თქვა ენმ-ის დეპუტატმა.

ნიკა მელია სიტყვით გამოსვლის შემდეგ იმ ადგილისკენ წავიდა, სადაც პრმიერ-მინისტრი მინისტრთა კაბინეტის წევრებთან ერთად იმყოფებოდა. სიტუაციის განმუხტვა პარლამენტის თავმჯდომარემ მანდატურებს სთხოვა, ნიკა მელიას კი მიმართა- ან დარბაზში ადგილი დაეკავებინა, ან სხდომათა დარბაზიდან გასულიყო.

რამდენიმეწუთიანი ხმაურისა და დაპირისპირების შემდეგ სიტუაცია განიმუხტა და სხდომა გაგრძელდა.