ნაგვის გატანა ღამის საათებში, პირველ ეტაპზე, რამდენიმე ქუჩაზე მოხდება – კალაძე

დღეს, 13 დეკემბერს, თბილისის მერმა კახა კალაძემ მერის მოადგილე მაია ბითაძეს დაავალა, პირველ ეტაპზე საყოფაცხოვრებო ნარჩენების გატანა ღამის საათებში დედაქალაქის რამდენიმე ქუჩაზე მოხდეს.

დედაქალაქის მთავრობის დღევანდელ სხდომაზე კახა კალაძემ მაია ბითაძეს საყოფაცხოვრებო ნარჩენების გატანასთან დაკავშირებული გეგმის წარდგენა სთხოვა. მაია ბითაძემ თბილისის მერს გააცნო სამუშაოები, რომლებიც ბოლო ორი კვირის განმავლობაში აღნიშნული მიმართულებით განხორციელდა.

“ამ ორი კვირის განმავლობაში, შესაბამისი საქალაქო სამსახური და „თბილსერვის ჯგუფი“ აქტიურად მუშაობდა, რომელმაც გარკვეული უბნები და მარშრუტები დაამუშავა. კვირის ბოლოს გვექნება კონკრეტული ქუჩების ჩამონათვალი, სადაც უკვე ძალიან მალე შეგვეძლება, აღნიშნული საპილოტე პროექტი განვახორციელოთ, რაშიც საზოგადოების ჩართულობა და მხარდაჭერა ძალიან დაგვჭირდება, რადგან ის სქემა, რაზეც ჩვენ ვმუშაობთ, დასუფთავების სამსახურის მანქანების ღამის საათებში მოძრაობას ითვალისწინებს, რაც თავისთავად ქალაქში არსებულ საცობებს განტვირთავს,” – აღნიშნა მაია ბითაძემ.

კალაძის განცხადებით, იმ შემთხვევაში, თუ საპილოტე პროექტი საზოგადოებისთვისაც მისაღები იქნება, საყოფაცხოვრებო ნარჩენების გატანა ღამის საათებში მოხდება.

“მთავარია, პირველ ეტაპზე რამდენიმე ქუჩა შეირჩეს და თუ მისაღები იქნება საზოგადოებისთვისაც, შეგვიძლია უკვე ამ ახალ მოდელზე გადავიდეთ,” – განაცხადა დედაქალაქის მერმა.

ნეტგაზეთის მასალების სხვა გამოცემებში გადაბეჭდვის წესი
ავტორი
გიორგი დიასამიძე არის ნეტგაზეთის რეპორტიორი 2014 წლიდან. აშუქებს საზოგადოებრივ-პოლიტიკურ თემებს, სპორტს და სხვა მიმდინარე მოვლენებს. ასევე, მუშაობს განათლების, ადამიანის უფლებებისა და სოციალურ საკითხებზე.