კოზონოვი აღნიშნული შეთანხმების კიდევ ერთი სიკეთის შესახებ საუბრობს.
“არავისთვისაა საიდუმლო, რომ ჩვენი მოქალაქეები მეზობელ საქართველოს მიმართავენ სამედიცინო მიზნით. ეს სიახლე კი მნიშვნელოვნად შეაჩერებს ამ პროცესს”.
რუსეთის კლინიკებში მომსახურების მისაღებად, როგორც ალან კოზონოვი ამბობს, რუსეთის მოქალაქეობის მიღება აუცილებელი პირობაა.
სამხრეთ ოსეთის დე ფაქტო რესპუბლიკიდან მკურნალობის მიზნით თბილისში ჩამოსულ პაციენტთა რაოდენობა, აფხაზი პაციენტების მსგავსად, ყოველწლიურად იზრდება. საქართველოს ჯანდაცვის სამინისტროს მიერ ნეტგაზეთისთვის მოწოდებული ინფორმაციის თანახმად, მხოლოდ 2017 წლის იანვრიდან- ივნისამდე სამკურნალოდ 322 პაციენტი, მათ შორის 46 ბავშვი ჩამოვიდა. მათ მკურნალობაზე კი ამ პერიოდში საქართველოს ბიუჯეტიდან 1 მილიონ ლარამდე [898, 852] დაიხარჯა.
სამხრეთ ოსეთის დე ფაქტო რესპუბლიკის პრეზიდენტი ანატოლი ბიბილოვი რამდენიმე კვირის წინ ოსურ მედიასთან ინტერვიუში საუბრობდა იმის შესახებ, რომ ქართულ კლინიკებში ოსი პაციენტების რაოდენობა უნდა შემცირდეს.
ჯამში, 2015 წლიდან 2017 წლის 19 ივნისამდე აფხაზ და ოს პაციენტებზე საქართველოს ჯანდაცვის ბიუჯეტიდან 12 მილიონ ლარზე მეტია დახარჯული.