ახალი ამბები

ხორავას ქუჩაზე მომხდარი დანაშაულის დაფარვის ბრალდებით 3 პირი დააკავეს

4 დეკემბერი, 2017 • 4991
ხორავას ქუჩაზე მომხდარი დანაშაულის დაფარვის ბრალდებით 3 პირი დააკავეს

საქართველოს შინაგან საქმეთა სამინისტროს განცხადებით, 1 დეკმებერს ხორავას ქუჩაზე მომხდარი მკვლელობის საქმეზე უწყებამ კიდევ 3 პირი დააკავა. როგორც შსს-ში აცხადებენ, დაკავებულებს ბრალი დანაშაულის დაფარვაში ედებათ.

“გამოძიებამ დაადგინა, რომ თ.კ-სთვის, ასევე, მისი შვილების – ლ.კ-სა და მ.კ-სთვის ცნობილი გახდა, რომ 2001 წელს დაბადებულმა არასრულწლოვანმა გ.ჯ-მ განსაკუთრებით მძიმე დანაშაული ჩაიდინა, რაც სამართალდამცველებს არ შეატყობინა. შესაბამისად, მოქალაქე თ.კ. დაკავებულია დანაშაულის დაფარვისთვის.

რაც შეეხება მოქალაქეებს – ლ.კ-ს და მ.კ-ს, მათ მიმართ მიმდინარეობს საგამოძიებო მოქმედებები და შესაძლოა, გაიზარდოს დანაშაულის დაფარვისა და შეუტყობინებლობისთვის სისხლის სამართლის პასუხისგებაში მისაცემ პირთა წრე” – ნათქვამია უწყების მიერ გავრცელებულ განცხადებაში.

რაც შეეხება კიდევ ორ დაკავებულს, საქართველოს შინაგან საქმეთა სამინისტროში აცხადებენ, რომ მათ ხელი შეუწყეს ბრალდებულის მიმალვას.

“ზემოაღნიშნულის გარდა, გამოძიებამ ასევე დაადგინა, რომ მოქალაქეებმა – გ.შ-მ და ზ.წ-მ ხელი შეუწყეს არასრულწლოვანი გ.ჯ-ს მიმალვას. შესაბამისად, მოქალაქეები გ.შ. და ზ.წ. დაკავებული არიან დანაშაულის დაფარვისთვის. შინაგან საქმეთა სამინისტრო აგრძელებს ხორავას ქუჩაზე მომხდარი მკვლელობის ფაქტთან დაკავშირებით ოპერატიულ-სამძებრო და საგამოძიებო ღონისძიებებს” – ამბობენ შსს-ში.


  • 1 დეკემბერს თბილისში, ხორავას ქუჩაზე, არასრულწლოვნებს შორის მომხდარი ჩხუბის დროს ცივი იარაღით ორი არასრულწლოვანი დაჭრეს. სასწრაფო დახმარების სამსახურმა დაჭრილები რესპუბლიკურ საავადმყოფოში გადაიყვანა, თუმცა გზაში ერთ-ერთი მათგანი გარდაიცვალა. მეორე არასრულწლოვანი 2 დეკემბერს გარდაიცვალა.
  • ფაქტზე შინაგან საქმეთა სამინისტრომ გამოძიება სისხლის სამართის კოდექსის 109-ე მუხლით დაიწყო, რაც განზრახ მკვლელობას გულისხმობს. პოლიციამ 2001 წელს დაბადებული ბრალდებული განზრახ მკვლელობის ბრალდებით 2 დეკემბერს დააკავა. 3 დეკემბერს პროკურატურამ 2 მოზარდი სისხლისსამართლებრივ პასუხისგებაში მისცა.
  • საქართველოს შინაგან საქმეთა მინისტრის, გიორგი გახარიას განცხადებით, ხორავას ქუჩაზე კონფლიქტში მონაწილე მოზარდების ძალიან მცირე ნაწილმა გამოთქვა გამოძებასთან თანამშრომლობის სურვილი, რაც უდიდეს პრობლემას წარმოადგენს არასრულწლოვნებს შორის დანაშაულების პრევენციისთვის.
  • 3 დეკემბერს, 51-ე სკოლასთან არასრულწლოვნებს შორის ხორავას ქუჩაზე მომხდარი ჩხუბის დროს მოკლული ბავშვების ოჯახებისადმი სოლიდარობის ნიშნად აქცია გაიმართა.

მასალების გადაბეჭდვის წესი