“კიბეების ქვეშ ათენებდა” – გორის თეატრის სკვერში კაცის ცხედარი იპოვეს

2 დეკემბერს, გამთენიისას, გორის თეატრის სკვერში შუახნის კაცის ცხედარი იპოვეს. შიდა ქართლის საინფორმაციო ცენტრს თეატრის შენობის გვერდით მცხოვრებლებმა განუცხადეს, რომ გარდაცვლილს საკუთარი სახლი აღარ ჰქონდა და სკვერთან, კიბეების ქვეშ ათენებდა.

ნეტგაზეთის კითხვაზე, შესაძლოა თუ არა, რომ ყინვის შედეგად დაღუპულიყო აღნიშნული პირი, შსს-ში განგვიცხადეს, რომ მიზეზების დასადგენად გამოძიება და ექსპერტიზა მიდინარეობს. უწყებაში აცხადებენ, რომ ცხედარს ძალადობის კვალი არ აღენიშნება.

გორის მერიასა და გამგეობაში განგვიცხადეს, რომ კაცის შესახებ, რომელიც თეატრის სკვერის გვერდით ღამეებს ატარებდა, მათთვის არავის უცნობებია. მათი განცხადებით, გორის მერიას ყველა უსახლკარო ადამიანი აღრიცხული ჰყავდა: “მერიასაც და გამგეობასაც ჰქონდა “ქირავნობის პროგრამა”, სადაც ყველა უსახლკარო იყო ჩართული, თუმცა ეს კაცი იქ არ ფიქსირდება.”

გორის  შს სამმართველომ გამოძიება სისხლის სამართლის კოდექსის 115-ე მუხლით დაიწყო, რაც თვითმკვლელობამდე მიყვანას გულისხმობს.

გორის თეატრი. ფოტო: ნინო ხიმშიაშვილი

ნეტგაზეთის მასალების სხვა გამოცემებში გადაბეჭდვის წესი


ავტორი
გიორგი დიასამიძე არის ნეტგაზეთის რეპორტიორი 2014 წლიდან. აშუქებს საზოგადოებრივ-პოლიტიკურ თემებს, სპორტს და სხვა მიმდინარე მოვლენებს. ასევე, მუშაობს განათლების, ადამიანის უფლებებისა და სოციალურ საკითხებზე.