გამამტყუნებელი განაჩენის შემდეგ, ხორვატმა გენერალმა ჰააგის სასამართლოში თავი მოიკლა

BBC-ის ინფორმაციით, 29 ნოემბერს, გაეროს ტრიბუნალის მოსამართლეების მიერ გამოტანილი გამამტყუნებელი განაჩენის შემდეგ, სამხედრო დანაშაულში ბრალდებულმა სლობოდან პრალიაკმა ჰააგის სასამართლოში პროტესტის ნიშნად საწამლავი დალია და რამდენიმე საათში დაიღუპა.

მას შემდეგ, რაც გენერალმა პატარა ჭიქიდან გაურკვეველი სითხე დალია, გაეროს ტრიბუნალის მოსამართლეებმა სხდომა დაუყოვნებლივ შეწყვიტეს. სლობოდან პრალიაკს პირველადი სამედიცინო დახმარება სასამართლოშივე აღმოჩენეს. მალევე გენერალი საავადმყოფოში გადაიყვანეს, თუმცა მისი გადარჩენა ვეღარ მოხერხდა.

ბოსნიელი მუსლიმების წინააღმდეგ სამხედრო დანაშაულში ბრალდებულ 72 წლის სლობოდან პრალიაკს 2013 წელს 20 წლით პატიმრობა მიუსაჯეს. ეს გადაწყვეტილება ხორვატმა გენერალმა გაეროს საერთაშორისო სასამართლოში გაასაჩივრა. პრალიაკი ჰააგის მოსამართლეების მიერ გამოტანილი გამამტყუნებელი განაჩენსაც არ დაეთანხმა და სწორედ ამის შემდეგ დალია პატარა ჭიქიდან ჯერჯერობით გაურკვეველი სითხე. მოსამართლეებს მან მხოლოდ ის უთხრა, რომ საწამლავი მიიღო.

სლობოდან პრალიაკის გარდა, სამხედრო დანაშაულში ბრალდებულია ბოსნიელ ხორვატთა კიდევ ხუთი ლიდერი, მათ შორის, იადრანკო პრლიჩი, რომელიც ჰააგის სასამართლოს მიერ მისჯილ 25 წლით პატიმრობას ასაჩივრებს.

სლობოდან პრალიაკმა ჰააგის სასამართლოში მის მიმართ გამოტანილი გამამტყუნებელი განაჩენის შემდეგ საწამლავით თავი მოიკლა. სქრინი: BBC

ნეტგაზეთის მასალების სხვა გამოცემებში გადაბეჭდვის წესი
ავტორი
გიორგი დიასამიძე არის ნეტგაზეთის რეპორტიორი 2014 წლიდან. აშუქებს საზოგადოებრივ-პოლიტიკურ თემებს, სპორტს და სხვა მიმდინარე მოვლენებს. ასევე, მუშაობს განათლების, ადამიანის უფლებებისა და სოციალურ საკითხებზე.