ივანიშვილმა ხეების გატანა ბათუმიდანაც დაიწყო – ამჯერად მაგნოლია

ბათუმში, თამარ მეფის გამზირის მიმდებარედ, მრავალწლოვან ხეებს თხრიან შეკვეთილში, ბიძინა ივანიშვილის დენდროლოგიურ პარკში გადასატანად.

ხეების გადატანაზე, როგორც ადგილზე გვითხრეს, თბილისური კომპანია მუშაობს: „ეს ერთი მაგნოლიის ხე გადაგვაქვს კერძო საკუთრებიდან. ჩვენ მხოლოდ გადატანაზე ვმუშაობთ და სამუშაოები როცა დავიწყეთ, ხე უკვე შესყიდული იყო. დენდროლოგიურ პარკში გადაგვაქვს“.

ბათუმი / 7.11.2017 / გურამ მურვანიძის ფოტო

ერთ-ერთი ადგილობრივის თქმით კი, ამ ადგილიდან სამი ძირი ხე გააქვთ: „სამი ძირი ხე მიაქვთ. ვისაც ნაკვეთი საკუთრებაში არ ჰქონდა დარეგისტრირებული, მგონი, 5 000-ს უხდიან. ლარს თუ დოლარს, არ ვიცი. ვისაც საკუთრებაში ჰქონდა, იმას უფრო მეტს. ადრე ეს ტერიტორია, სადაც ხეებს თხრიან, ყოფილ მეურნეობას ეკუთვნოდა.“

ბათუმი / 7.11.2017 / გურამ მურვანიძის ფოტო

მაგნოლიის მრავალწლოვანი ხე გადასატანად თითქმის მზადაა. მუშების თქმით, ხეს დაახლოებით 10 დღეშში გაიტანენ.

მაგნოლიიდან რამდენიმე მეტრში კი გზა სხვა სახეობის ხეებთანაც არის მიყვანილი. ხეებს გაშიშვლებული ფესვები შეხვეული აქვს.

ბათუმი / 7.11.2017 / გურამ მურვანიძის ფოტო

ბათუმი / 7.11.2017 / გურამ მურვანიძის ფოტო

ხეს ამჯერადაც ზღვით გაიტანენ, რისთვისაც პლაჟზე კეთდება დროებითი ნავმისადგომი. დროებითი გადასასვლელი ეწყობა რკინიგზაზეც.

ბათუმი / 7.11.2017 / გურამ მურვანიძის ფოტო

აჭარიდან ხეების გადატანა სოფელ შეკვეთილში, სადაც ყოფილი პრემიერი, მილიარდელი ბიძინა ივანიშვილი პარკს აშენებს, 2016 წელს დაიწყო. ეს პარკი ივანიშვილის საკუთრებაა.

ამავე თემაზე:

ივანიშვილის დანატოვარი

ტიტას ხე ივანიშვილის პარკში იქ აღარ დგას, სადაც დარგეს

ბოლო ორი მაგნოლია, რომელიც ივანიშვილს ციხისძირიდან მიაქვს

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com