ოპოზიციის ერთიანი კანდიდატი თბილისში უარეს შედეგს აჩვენებდა – ინტერვიუ სერგი კაპანაძესთან

2017 წლის ადგილობრივ თვითმმართველობის არჩევნებში “ევროპულმა საქართველომ” მონაწილეობა პირველად მიიღო და არჩევნებზე ხმების 10.41% (156 291 ხმა) მიიღო. ამ ფონზე შემცირდა ენმ-ის მხარდამჭერების რაოდენობა, ამას გარდა, გაიზარდა ოცნების და პატრიოტთა ალიანსის მხარდამჭერების რიცხვი. როგორ აფასებს “ევროპული საქართველო” ადგილობრივი თვითმმართველობის არჩევნებს, ამის თაობაზე ვრცლად პარტიის ერთ-ერთ ლიდერს, სერგი კაპანაძეს ვესაუბრეთ:

21 ოტომბრის არჩევნების შედეგებს თუ შევადარებთ გასული წლების არჩევნების შედეგებს, ვნახავთ, რომ გაიზარდა ქართული ოცნებისა და პატრიოტთა ალიანსის მხარდამჭერების რაოდენობა. რით შეგიძლიათ ამის ახსნა?

“ქართული ოცნების” შემთხვევაში ზრდის მიზეზი არის ის, რომ მოსახლეობის დიდ ნაწილში იმედგაცრუებაა და ისინი არჩევნებზე არ მიდიან. არჩევნებზე დაბალი აქტივობით სარგებლობს “ქართული ოცნება” და, მეორე მხრივ, თვითონ ახდენს ამომრჩევლის მობილიზებას. მათ შორის, ადმინისტრაციული რესურსის გამოყენებით და  ხმების ყიდვით.  ჩვენ ვნახეთ რამდენიმე ახალი პრაქტიკა, როდესაც მათი კოორდინატორები რეგისტრატორერების უკან იდგნენ და პირდაპირ აფიქსირებდნენ – ვინ მოვიდა და ვინ – არა. ეს ყველაფერი განაპირობებს იმას, რომ “ქართულმა ოცნებამ” ამდენი ხმა მიიღო.

ზოგადად, “პატრიოტთა ალიანსის”  მსგავსი პოლიტიკური გუნდის წარმატებები პირდაპირ კავშირშია იმასთან, რომ მათ წახალისებას დღევანდელი ხელისუფლება ახდენს. პრორუსული გზავნილები, რომლებსაც ვითომ  ეროვნული შეფერილობა გააჩნია, პოპულარული ხდება ბოლო დროს სწორედ იმის გამო, რომ “ქართული ოცნება” ისეთ ტიპის პოლიტიკას ატარებს, როგორიც დღევანდელ ხელისუფლებას გააჩნია. ზოგადად, რთულია ერთმანეთს შეადარო საპარლამენტო და ადგილობრივი არჩევნები.

თქვენმა პოლიტიკურმა ძალამ, როგორც ცალკე პარტიამ, მართალია, პირველად მიიღო არჩევნებში მონაწილეობა და მიიღო დაახლოებით ხმების 10%, ხოლო იმ ძალამ, რომელსაც თქვენ გაემიჯნეთ, მიიღო 17%. გასულ წელს ჩატარებული არჩევნების შედეგებით, როცა თქვენ და ენმ ერთად გამოდიოდით არჩევნებზე, თქვენ მიიღეთ 27%, ფაქტობრივად, გამოდის, რომ თქვენი მომხრეების ხმები გაიყო. ეთანხმებით ამ მოსაზრებას?

არ არის სწორი, შეადარო ერთმანეთს წინა პროცენტი პროცენტს. მას შემდეგ, რაც  “ნაციონალური მოძრაობა” ორ ნაწილად დაიშალა, ჩვენ ჩვენი ელექტორატი გაგვიჩნდა და ეს არის უკვე 10%. ასეთ ვითარებაში ჩატარებულ არჩევნებში ძნელია რამე პროგრესზე და კარგზე ილაპარაკო, მაგრამ ჩვენთვის, როგორც პირველად დამოუკიდებლად მონაწილე პარტიისთვის, ურიგო შედეგი არ არის. დარწმუნებული ვარ,  ჩვენი ამომრჩეველი კიდევ უფრო გაიზრდება. ჩვენ განსხვავებული ელექტორატიც გვყავს.  ყველა პოლიტიკური პარტია, ჩვენ განსაკუთრებით, აქცენტს ვაკეთებთ ნებისმიერი ამომრჩევლის მომხრობაზე და არ ვანაწილებთ ამომრჩეველს, ისინი ტრადიციულად რომელ პოლიტიკურ პარტიას უჭერდნენ მხარს. ამიტომ ნებისმიერი ხმა ჩვენთვის ძალიან მნიშვნელოვანია. აქედან გამომდინარე ვიბრძოლებთ, რომ ამ ხმების რაოდენობა კიდევ უფრო გაიზარდოს.

ანუ მხოლოდ ენმ-ის მხარდამჭერებში არ ხედავთ რესურსს?

არა, ბუნებრივია, არ ვხედავთ და ძალიან ბევრი რაიონი აჩვენებს სწორედ მაგას, რომ ადამიანები მოვიდნენ არჩევნებზე და მხარი დაგვიჭირეს. ამ ადამიანებს შორის იყვენენ ისეთებიც, რომლებიც ნაციონალურ მოძრაობას მხარს არ უჭერდნენ.

თბილისში მერის არჩევნების შედეგებიდან გამომდინარე, ხომ არ ფიქრობთ, რომ საერთო ოპოზიციური კანდიდატი თბილისის მერის არჩევნებში უფრო ეფექტური იქნებოდა მმართველი კანდიდატის წინააღმდეგ?

პრაიმერის ჩატარება და ერთი კანდიდატის დაყენება, ეს  პიარ სვლა იყო მცირე რეიტინგის მქონე პოლიტიკური გუნდის მხრიდან. ასეთ შემთხვევაში მე არ ვარ დარწმუნებული, რომ ამომრჩველმა, რომელმაც ჩვენს პარტიას მხარი დაუჭირა ან “ნაციონალურ მოძრაობას”, ისინი მაშინვე გაერთიანდებოდნენ ერთი კანდიდატის ირგვლივ. მგონია, რომ ერთიანი კანდიდატი უარეს შედეგს აჩვენებდა, რადგან ტრადიციული პარტიების მხარდამჭერებს, არ მგონია, ასე შერჩეული კანდიდატისთვის  მხარი დაეჭირათ.

დღეს ბევრს საუბრობენ სადამკვირვებლო ორგანიზაციები, რომ ქართული ოცნება კოორდინატორების მეშვეობით ახდენდა ამომრჩევლის მობილიზებას. თქვენ თუ გყავდათ კოორდინატორები, რამდენი და რა თანხა დახარჯეთ ამაზე?

ჩვენ, სამწუხაროდ, ეგეთი ტიპის სისტემა არ გვაქვს. სამწუხაროდ თუ საბედნიეროდ, იმ მარტივი მიზეზის გამო, რომ ისეთი თანხა და რესურსი, რომელიც მმართველ ძალას აქვს, არ გაგვაჩნია. ჩვეულებრივი კონტაქტებით ჩვენი ამომრჩევლის მობილიზებას ვახერხებდით. არანაირი ორგანიზებული სისტემა არ გვქონია. 

დავაზუსტებ, თქვენ კოორდინატორები ფინანსების გამო არ გყავდათ, ფული რომ გქონოდათ, ისარგებლებდით ამ სერვისით?

ბუნებრივია, პარტიის აქტივი გვყავს. ესენი არიან პარტიის მხარდამჭერები, რომლებიც მუშაობენ ხალხთან. მათ შორის არიან პარტიის ლიდერები და წარმომადგენლები. მე, მაგალითად, ჭიათურაში ვიყავი და, ჯამში, ასზე მეტი შეხვედრა გავმართე, იქ აქტივიც ძალიან ძლიერი გვყავდა და, ჯამში, 10% ავიღეთ იქ. ეს სისტემა, რომელიც “ქართულ ოცნებას” გააჩნია, როდასაც ისინი კოორდინატორებს ქირაობენ, უხდიან ფულს და შემდეგ ეს კოორდინატორები ფორმდებიან დამკვირვებლებად და რეგისტრატორის უკან დგანან და ხედავენ, ვინ მოდის არჩევნებზე და ვინ-არა. შემდეგ ამ სიებს თავიანთ ცენტრს აწვდიან და ისინი უკავშირდებიან იმ ამომრჩევლებს, რომლებიც ჯერ არ მივიდნენ არჩევნებზე, აშინებენ მათ და ფულს სთავაზობენ. ეს სისტემა “ქართულმა ოცნებამ” მოიგონა. ბუნებრივია, მსგავსი რაღაც ჩვენ არ გვქონდა.

მიიჩნევთ თუ არა, რომ ქართული ოცნება ახდენდა ამომრჩევლის ნების კონტროლს, როცა მათი წარმომადგენლები საარჩევნო უბანზე სამაგიდო სიებიდან ახდენდნენ მისული ამომრჩევლების აღრიცხვას?

ბუნებრივია, ახდენდა. ყველა ადამიანს გააჩნია უფლება მივიდეს და ხმა მისცეს ისე, რომ არავინ გაიგოს ამის შესახებ. ეს პრინციპი დაარღვია “ქართულმა ოცნებამ”. იყო დაშინების შემთხვევებიც. ვისაც სოციალური დახმარება ჰქონდა დანიშნული, მათ წინასწარ აშინებდნენ, რომ თუ ისინი “ქართულ ოცნებას” ხმას არ მისცემდნენ, სოციალურ დახმარებას მოუხსნიდნენ. ასევე აშინებდნენ საჯარო სამსახურში დასაქმებულ ადამიანებს. 

თქვენი აზრით, ის ფაქტი, რომ 2014 წლის არჩევნებთან შედარებით მკვეთრად დაეცა ნინო ბურჯანაძის ძალის მხარდამჭერების რაოდენობა, თუმცა გარკვეულწილად გაიზარდა სპა-ს მხარდამჭერების რიცხვი, რაზე შეიძლება მიუთითებდეს ქვეყანაში პრორუსული განწყობების მქონე ელექტორატთან მიმართებაში?

ამის ანალიტიკოსად მე არ გამოვდგები. რაც შეეხება პრორუსულ განწყობებს, ეს დაკავშირებულია ამ ხელისუფლებასთან. ნაცვლად იმისა, რომ ებრძოლოს რუსულ განწყობებს, პირიქით,  ხელს უწყობენ. მაგალითად, მთავრობის წარმომადგენლები ღიად მხარს უჭერდნენ ქართულ მარშს და მათი მთავრობის კაბინეტის ყოფილი წევრი იღებდა მონაწილეობას ქართულ მარშში. ბრეგაძეს ვგულისხმობ. ღიად აფინანსებენ პრორუსულ და ქსენოფობიურ მედიასშუალებებს.  გადასახადის გადამხდელთა ფული მიდის ამ მედიასაშუალებებში. არ ვარ დარწმუნებული, რომ ეს შედეგი მეტყველებს იმაზე, რომ “პატრიოტთა ალიანსი” აღმავლობას განიცდის. მათ ჰყავთ სტაბილური, რამდენიმეპროცენტიანი ელექტორატი, რომელიც ადრე შეიძლება ბურჯანაძის იყო. დღეს პარტიორტთა ალიანსის არის.

თქვენ განაცხადეთ, რომ კოორდინატორების დასაქირაველბლად ფინანსები არ გქონდათ, სამაგიეროდ, თქვენი პოლიტიკური ძალის პრესსამსახურის წარმომადგენელმა არჩევნებამდე 2 თვით ადრე დააფუძნა საინფორმაციო სააგენტო “ნიუს სფეისი”, რომელსაც ჰყავდა უპრეცედენტო რაოდენობის წარმომადგენლები აკრედიტებულ ჟურნალისტებად, მერე უბნებზე ვნახეთ, რომ ამ ადამიანებს ჟურნალისტებთან არაფერი ჰქონდათ საერთო. იყენებდით თუ არა ამ ადამიანებს თქვენი პარტიული ინტერესების გათვალისწინებთ დამატებით წარმომადგენლებად საარჩევნო უბანზე და თუ ასეა, რისთვის დაგჭირდათ ეს?

მაგაზე უკეთეს პასუხს ჩვენი პრესსამსახური გაგცემთ. მე არ მაქვს ინფორმაცია.

არ გაქვთ ინფორმაცია ამ სააგენტოს შესახებ, რომლის დამფუძნებელი თქვენი პარტიის თანამშრომელია.

რომ არსებობდა, კი ვიცოდი, მაგრამ კონკრეტულად მის ფუნქციაზე პასუხს აგებს ის ადამიანი, ვინც შექმნა  და მას დაუკავშირდით.

 

ნეტგაზეთის მასალების სხვა გამოცემებში გადაბეჭდვის წესი
ავტორი
მარიამ ვარადაშვილი არის ნეტგაზეთის რეპორტიორი 2017 წლის სექტემბრიდან.