უკრაინის უმაღლეს რადასთან დაპირისპირების დროს დაკავებული 11 მომიტინგე გაათავისუფლეს. unian-ის ცნობით, სიტუაცია აქციაზე მას შემდეგ დაიძაბა, რაც პოლიციამ იმ ფარებისა და ამუნიციის ნაწილის დაბრუნება სცადა, რომელიც აქციის მონაწილეებმა ოთხშაბათის დაპირისპირებისას სამართალდამცავებს წაართვეს. გათავისუფლებული მომიტინგეები “კარვების ქალაქში” ღამითვე დაბრუნდნენ.
დილიდან აქტივისტებმა კარვების ნაწილი დაშალეს და პარლამენტის სხდომას ელოდებიან. სხდომაზე უნდა განიხილონ ორი კანონპროექტი – სადეპუტატო ხელშეუხებლობის მოხსნისა და საარჩევნო კოდექსში ცვლილებების შეტანის შესახებ.
unian-ის ცნობით, აქციის მონაწილეების მესამე მოთხოვნა, რომელიც ანტიკორუფციული სასამართლოს შექმნას ეხება, პარლამენტის დღის წესრიგში ჯერჯერობით შეტანილი არ არის. აქტივისტების თქმით, ისინი წინააღმდეგობის გარეშე შეუშვებენ ყველა დეპუტატს უმაღლეს რადაში, თუმცა, მათ მოთხოვნებზე უარყოფითი პასუხის მიღების შემთხვევაში, ისინი დეპუტატებს პარლამენტიდან აღარ გამოუშვებენ.
კიევის ცენტრში აქციები უკვე მესამე დღეა მიმდინარეობს. საქართველოს ყოფილი პრეზიდენტი, მიხეილ სააკაშვილი, რომლის პარტია “რუხ ნოვიხ სილ” პარლამენტთან აქციის ერთ-ერთი ორგანიზატორია, უკრაინის ერთ-ერთ არხთან ინტერვიუში აღნიშნავს, რომ აქციები ხანგრძლივობა უმაღლესი რადას გადაწყვეტილებაზეა დამოკიდებული.
“ხალხი პოლიტიკური რეფორმის დაწყებას ითხოვს, ხელისუფლებამ გადაწყვიტა, რომ რადასთან შეკრებილი აქტივისტების მოთხოვნებს დღეს განიხილავენ. ეს მას შემდეგ გადაწყვიტეს, რაც პარლამენტის წინ შეკრებული ადამიანები და ამ საკითხის მიმართ ხალხის დამოკიდებულება დაინახეს. გაგრძელდება თუ არა აქციები, დამოკიდებულია იმაზე, თუ რას გადაწყვეტს რადა. ხალხს მოვუწოდებთ, მოვიდნენ პარლამენტთან და აქციას შეურთდნენ იმ დროს, როცა რადა ხმის მიცემას დაიწყებს. არ უნდა გამოვუშვათ ისინი პარლამენტიდან, სანამ კანონს არ მიიღებენ.” – განაცხადა მიხეილ სააკაშვილმა.