ევროპული საქართველოს თელავის ოფისს პირი სათამაშო იარაღით დაესხა თავს

დღეს, 8 ოქტომბერს, ევროპული საქართველოს თელავის ოფისს შეიარაღებული პირი დაესხა თავს, რომელიც იქ მყოფი აქტივისტებისგან საქმიანობის შეწყვეტას მოითხოვდა, წინააღმდეგ შემთხვევაში კი იარაღის გამოყენებით იმუქრებოდა. შსს-ს ცნობით, იარაღი სათამაშო აღმოჩნდა.

“სამწუხაროდ, ეს არაა პირველი შემთხვევა, როდესაც ევროპული საქართველოს წევრებს ემუქრებიან ან თავს ესხმიან. ეს გაგრძელებაა ქართული ოცნების ხელისუფლების რამდენიმეწლიანი პრაქტიკისა, როცა მოძალადეებს, დასჯის მაგივრად, ახალისებენ, ხოლო პოლიტიკურ ოპონენტებზე ფიზიკური თავდასხმა საარჩევნო კამპანიის ნაწილია,” – ნათქვამია ევროპული საქართველოს განცხადებაში.

საქართველოს შინაგან საქმეთა სამინისტროში გვაცნობეს, რომ აღნიშნულ ფაქტზე თელავის რაიონულ სამმართველოში დაიწყო გამოძიება სისხლის სამართლის კოდექსის 151-ე მუხლით, რაც მუქარას გულისხმობს. როგორც შსს-ში განგვიცხადეს, სამართლადამცველებმა ოპერატიულად დაადგინეს პირის ვინაობა და მისი პირადი ჩხრეკისას ნივთმტკიცებად სათამაშო იარაღი ამოიღეს. უწყების განცხადებით, ამ დროისთვის მიმდინარეობს საგამოძიებო მოქმედებები.

ნეტგაზეთის მასალების სხვა გამოცემებში გადაბეჭდვის წესი
ავტორი
გიორგი დიასამიძე არის ნეტგაზეთის რეპორტიორი 2014 წლიდან. აშუქებს საზოგადოებრივ-პოლიტიკურ თემებს, სპორტს და სხვა მიმდინარე მოვლენებს. ასევე, მუშაობს განათლების, ადამიანის უფლებებისა და სოციალურ საკითხებზე.