დღეს, 28 სექტემბერს, საქართველოს ეროვნული უნივერსიტეტის (სეუ) კუთვნილი შენობის მეხუთე სართულიდან მშენებლობაზე დასაქმებული ახალგაზრდა კაცი გადმოვარდა და დაიღუპა. ამის შესახებ ინფორმაცია ნეტგაზეთს შინაგან საქმეთა სამინისტროში დაუდასტურეს.
ნეტგაზეთის ინფორმაციით, დაიღუპა 30 წლამდე კაცი, რომელსაც 9 თვის ბავშვი დარჩა. მას პირველი სამუშაო დღე ჰქონდა ობიექტზე.
პოზიციის დასაფიქსირებლად ნეტგაზეთი საქართველოს ეროვნული უნივერსიტეტის ადმინისტრაციასთან დაკავშირებას ცდილობს. უნივერსიტეტში სასწავლო პროცესი 2 ოქტომბერს იწყება.
როგორც ნეტგაზეთს შსს-ში განუცხადეს, გამოძიება სისხლის სამართლის კოდექსის 240-ე მუხლის მეორე ნაწილით დაიწყო, რაც სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას გულისხმობს, რამაც ადამიანის სიცოცხლის მოსპობა გამოიწვია.
2015-17 წლებში სამუშაო ადგილებზე დაღუპული ადამიანების შესახებ სტატისტიკა და ინფორმაცია, როცა პოლიცია სისხლის სამართლის კოდექსის 240-ე მუხლით იწყებდა გამოძიებას, უფრო ვრცლად შეგიძლიათ წაიკითხოთ ამ ბმულზე.
აქცია ეფექტური შრომის ინსპექციის შექმნის მოთხოვნით. ფოტო: ქეთი მაჭავარიანი/ნეტგაზეთი
