პროკურატურამ ფირცხალავას ჩვენების მიცემაზე უარის თქმის გამო ბრალი წარუდგინა

საქართველოს პროკურატურამ “ციანიდის საქმეზე” ჩვენების მიცემაზე უარის თქმისთვის “კორტების სპეცოპერაციის” საქმეზე მსჯავრდებული ირაკლი ფირცხალავა ბრალდებულის სახით სისხლის სამართლის პასუხისგებაში მისცა სსკ-ის 371-ე მუხლით, რაც ითვალისწინებს მოწმის ან დაზარალებულის მიერ ჩვენების მიცემაზე უარის თქმას.

2017 წლის 25 ივნისს საქართველოს პროკურატურამ ჟურნალისტ ირაკლი მამალაძის მიერ გაკეთებული განცხადების საფუძველზე დაიწყო გამოძიება მოწმეზე განხორციელებული შესაძლო ზემოქმედების ფაქტზე. მამალაძემ განაცხადა, რომ მსჯავრდებულ ფირცხალავას მხრიდან ხორციელდებოდა მიზანმიმართული ფსიქოლოგიური ზემოქმედება, ასევე, მისი დისკრედიტაცია და პატივისა და ღირსების შელახვა, რაც მიზნად ისახავდა გიორგი მამალაძის ბრალდების საქმეზე სასამართლოში მის მიერ მიცემული ჩვენების შეცვლას.

“ხსენებულ საქმეზე 2017 წლის 06 ივლისს სასჯელაღსრულების მე-9 პენიტენციურ დაწესებულებაში დაიგეგმა ი.ფ-ს მოწმის სახით გამოკითხვა, რა დროსაც მან უარი განაცხადა ჩვენების მიცემაზე.

აქედან გამომდინარე, ბრალდების მხარემ იშუამდგომლა თბილისის საქალაქო სასამართლოს წინაშე ი.ფ-ს მოსამართლის წინაშე დაკითხვის თაობაზე. თბილისის საქალაქო სასამართლოს მიერ 2017 წლის 06 ივლისს გაიცა განჩინება მოწმე ი.ფ-ს თბილისის საქალაქო სასამართლოს მოსამართლის წინაშე დაკითხვის შესახებ. ი.ფ-მ ამჯერადაც უარი განაცხადა სასამართლოში დაკითხვის პროცესში მონაწილეობის მიღებაზე, რის საფუძველზეც მოსამართლის მხრიდან მიღებულ იქნა გადაწყვეტილება მოწმის ადგილსამყოფელის მიხედვით, კერძოდ N მე-9 პენიტენციურ დაწესებულებაში დაკითხვის შესახებ.

2017 წლის 07 ივლისს თბილისის საქალაქო სასამართლოს მოსამართლე, სასამართლო შემადგენლობით, გამოცხადდა N მე-9 პენიტენციურ დაწესებულებაში, რათა მოეხდინა მოწმე ი.ფ-ს დაკითხვა, თუმცა მან კვლავ უარი განაცხადა ჩვენების მიცემაზე.

2017 წლის 26 ივლისს ბრალდების მხარემ კვლავ მიმართა თბილისის საქალაქო სასამართლოს ი.ფ-ს მოწმის სახით სასამართლოს წინაშე დაკითხვის თაობაზე. შუამდგომლობა თბილისის საქალაქო სასამართლოს მიერ დაკმაყოფილდა და 2017 წლის 26 ივლისს მოსამართლის მიერ გაცემულ იქნა განჩინება მოწმე ი..-ს თბილისის საქალაქო სასამართლოს მოსამართლის წინაშე დაკითხვის თაობაზე. ი.ფ-მ მორიგ ჯერზეც უარი განაცხადა თბილისის საქალაქო სასამართლოში დაკითხვის პროცესში მონაწილეობის მიღებაზე და 2017 წლის 27 ივლისს, პროკურორის შუამდგომლობის საფუძველზე, მოსამართლის მიერ მიღებულ იქნა გადაწყვეტილება მოწმე ი.ფ-ს N მე-9 პენიტენციურ დაწესებულებაში დაკითხვის შესახებ.

გადაწყვეტილების გამოტანიდან იმავე დღეს, სასამართლო შემადგენლობა გამოცხადდა N მე-9 პენიტენციურ დაწესებულებაში, რათა მომხდარიყო მოწმე ი.ფ-ს დაკითხვა. მიუხედავად იმისა, რომ მოწმეს მოსამართლის მხრიდან არაერთხელ განემარტა ჩვენების მიცემაზე უარის თქმისთვის სისხლისსამართლებრივი პასუხისმგებლობის შესახებ, ი.ფ-მ კვლავ უარი განაცხადა ჩვენების მიცემაზე.

აღნიშნულიდან გამომდინარე, საქართველოს პროკურატურის გადაწყვეტილებით, მსჯავრდებულ ი.ფ-ს ბრალი წარედგინა საქართველოს სისხლის სამართლის კოდექსის 371-ე მუხლით (მოწმის ან დაზარალებულის მიერ ჩვენების მიცემაზე უარის თქმა). წარდგენილი ბრალდება სასჯელის სახედ და ზომად ითვალისწინებს თავისუფლების აღკვეთას ოთხ წლამდე ვადით,”- აცხადებს პროკურატურა.

ნეტგაზეთის მასალების სხვა გამოცემებში გადაბეჭდვის წესი
ავტორი