“იმ შემთხვევაში, თუ პარლამენტი გამომიცხადებს ნდობას, როგორც გენერალური აუდიტორი, ვიზრუნებ სამსახურის ინსტიტუციონალურ შემდგომ განვითარებაზე, სამსახურის საქმიანობას თვისობრივად ახალ დონეზე ავიყვან”, – განუცხადა ჟურნალისტებს დღეს გენერალური აუდიტორის პოსტზე წარდგენილმა კანდიდატმა ირაკლი მექვაბიშვილმა, რომელიც ამ წუთებში საპარლამენტო უმცირესობის წარმომადგენლებს ხვდება.

მისი თქმით, მისი საქმიანობა ამ მიმართულებით ოთხ ძირითად პრინციპზე იქნება აგებული:

“ეს იქნება ობიექტურობა, დამოუკიდებლობა, პროფესიონალიზმი და საჯაროობა. რაც შეეხება თვისობრივად ახალ დონეზე გადაყვანას, სამსახური ტექნოლოგიურად უნდა განვითარდეს, მისი საქმიანობა უნდა იყოს უფრო პრევენციული ხასიათის და არა რაიმე სადამსჯელო სტრუქტურა. თუმცა, თუ ჩვენ ვნახავთ, რომ კანონთან რაიმე შეუსაბამობაა, ძალიან მყისიერი შეფასება და რეაგირება მოჰყვება”, – განაცხადა მექვაბიშვილმა.