თბილისის მერი დავით ნარმანია პეკინის ქუჩაზე ველობილიკის მოწყობის სამუშაოებს გაეცნო.

მერიის პრესსამსახურის ცნობით, ბულაჩაურის ქუჩიდან მიროტაძის ქუჩამდე 1 კმ-იანი, 2,80 მეტრის სიგანის ველობილიკი კეთდება. ველობილიკზე ორმხრივი მოძრაობა იქნება შესაძლებელი. თბილისის მერიის ტრანსპორტის სამსახური კი იქ შესაბამის ნიშნებს განათავსებს.

ველობილიკი

დედაქალაქის მერის დავით ნარმანიას განცხადებით, თბილისში ასეთი თანამედროვე და მოწესრიგებული ფორმით ველობილიკი პირველად კეთდება.

„დღეს იგება ველობილიკი და ამით პრაქტიკულად სრულდება პეკინის გამზირზე მიმდინარე სამუშაოები. მნიშვნელოვანია ის, რომ თბილისში პირველად კეთდება ასეთი ევროპული, თანამედროვე და მოწესრიგებული ფორმით საველოსიპედო ბილიკი.  ტროტუარი გაფართოვდა და მაქსიმალური კომფორტი იქნება იმისათვის, რომ როგორც ველოსიპედით მოსიარულეებმა, ასევე ფეხით მოსიარულეებმა თავი იგრძნონ თავისუფლად. თან ეს ყველაფერი კეთდება ისე, რომ უკვე აღდგენილია და თავისუფალია სამანქანო მოძრაობა . უახლოეს დღეებში დაიხაზება როგორც ფეხით მოსიარულეთა გადასასვლელები, ასევე,  სამანქანო ნაწილი.  შესაბამისად, 21 სექტემბრიდან, როცა ჩვენ საბოლოოდ გავხსნით პეკინის გამზირს, დასრულდება ყველა სამუშაო“,-განაცხადა დავით ნარმანიამ.

მერიის პრესსამსახურის ცნობით, ამ დროისთვის ძირითადი სამუშაოები უკვე დასრულებულია და მოძრაობა სრულად აღდგენილია.