დავით საყვარელიძე უკრაინის სისხლის სამართლის კოდექსის სამი მუხლის დარღვევაშია ეჭვმიტანილი. შესაბამისი ოქმი  საყვარელიძეს ცოტა ხნის წინ გადასცეს. როგორც უკრაინული მედია იუწყება, საქმე მიხეილ სააკაშვილის მიერ 10 სექტემბერს უკრაინის საზღვრის გადაკვეთას უკავშირდება.

ოქმის გადაცემის პროცესს დავით საყვარელიძე საკუთარ Facebook გვერდზე პირდაპირ ეთერში გადასცემდა. პროკურატურის წარმომადგენლის თქმით, საყვარელიძე ეჭვმიტანილია უკრაინის სისხლის სამართლის კოდექსის სამი მუხლის დარღვევაში – საზღვრის უკანონო გადაკვეთა, ჯგუფური არეულობის მოწყობა და სამართალდამცველებისთვის წინააღმდეგობის გაწევა.

ვიდეოში, რომელიც დავით საყვარელიძის Facebook გვერდზე გამოქვეყნდა, თავად საყვარელიძე აცხადებს, რომ დოკუმენტში, რომელიც მას წარუდგინეს, არ არის იურიდული ლოგიკა და გაურკვეველია, რომელი საზღვრის გადაკვეთას ედავება უკრაინის პროკურატურა.

მნიშვნელოვანი დეტალები:

• მიხეილ სააკაშვილმა  10 სექტემბერს უკრაინის საზღვარი მხარდამჭერების დახმარებით გადალახა. უკრაინის ხელისუფლება სააკაშვილს ქვეყანაში შესვლის საშუალებას არ აძლევდა. მიხეილ სააკაშვილთან ერთად მისი ოჯახის წევრები, რადას დეპუტატები და უკრაინის ყოფილი პრემიერ-მინისტრი იულია ტიმოშენკო იმყოფებოდნენ.
• მიხეილ სააკაშვილს უკრაინის მოქალაქეობა 2017 წლის ივლისში ჩამოართვეს. საქართველოს მესამე პრეზიდენტი საქართველოს მოქალაქე აღარაა 2015 წლიდან, როდესაც უკრაინაში ოდესის გუბერნატორის თანამდებობა დაიკავა. თუმცა შემდეგ ხელისუფლებას დაუპირისპირდა და ოპოზიციაში გადავიდა.
• უკრაინის შსს-ს ინფორმაციით, სასაზღვრო პუნქტზე განვითარებული მოვლენების შედეგად 11 სამართალდაცმველი დაშავდა.