რუსეთის ფედერაცია 2018 წლისთვის თავდაცვის ხარჯების შემცირებას გეგმავს

რუსეთის ფედერაციის პრეზიდენტმა ვლადიმერ პუტინმა განაცხადა, რომ 2018 წლისთვის თავდაცვის ხარჯები შემცირდება. მისივე თქმით, ხარჯების შემცირება გავლენას არ მოახდენს არმიის და ფლოტის ხელახალ აღჭურვაზე, რომელიც ქვეყანას დაგეგმილი აქვს. აღნიშნულ ინფორმაციას “გაზეტა რუ” “რია ნოვოსტიზე” დაყრდნობით ავრცელებს.

“მინდა შეგახსენოთ, რომ მომავალ წელს ქვეყნის ბიუჯეტში გაწეული მნიშვნელოვანი ეკონომია ითვალისწინებს თავდაცვის ხარჯების შემცირებას. ეს არ ეხება ჩვენ გეგმებს არმიის და ფლოტის ხელახალი აღჭურვის შესახებ”,- განაცხადა პუტინმა “ერთიანი რუსეთის” ფრაქციის ხელმძღვანელთან რუსეთის სათათბირო დუმაში გამართულ შეხვედრაზე.

ვლადიმერ პუტინის თქმითვე, რუსეთის სათათბირო დუმაში ქვეყნის მთავარი ფინანსური დოკუმენტის სიღრმისეული განხილვა უნდა მოხდეს, რადგან ეს ქვეყნის უსაფრთხოებას, თავდაცვას, ეკონომიკას და სოციალურ პასუხისმგებლობას ეხება.

ნეტგაზეთის მასალების სხვა გამოცემებში გადაბეჭდვის წესი
ავტორი
ელენე ხაჭაპურიძე არის ნეტგაზეთის რეპორტიორი 2011 წლიდან. აშუქებს პოლიტიკის, განათლების, ჯანდაცვის, ადამიანის უფლებებს და მიმდინარე მოვლენებს. e-mail ellen.khachapuridze@gmail.com