pensi

ილია მეორემ პენსს ტრამპებისთვის ოქროს სამაჯური და ოქროს ჯვარი გაატანა

მართლმადიდებელი ეკლესიის პარტიარქმა ილია მეორემ აშშ-ის ვიცეპრეზიდენტ მაიკ პენსს, აშშ-ის პრეზიდენტ დონალდ ტრამპისა და მელანია ტრამპისთვის საჩუქრად ოქროს სამაჯური და ოქროს ჯვარი გაატანა.

სიონის საკათედრო ეკლესიაში სტუმრობის დროს აშშ-ის ვიცეპრეზიდენტი თავის მეუღლესთან, კარენ პენსთან ერთად იმყოფებოდა. მათ ილია მეორე შეხვდა და სიონის ეკლესია დაათვალიერებინა. ილია მეორემ მაიკ პენსს ოქროს სამაჯური აჩუქა, ხოლო კარენ პენსს- ოქროს ჯვარი, რომელიც თამარ მეფის ჯვრის ასლადაა მიჩნეული.


“ძალიან დიდად ვაფასებთ ვიცეპრეზიდენტის დაინტერესებას ჩვენი ქვეყნისადმი, მის მხარდაჭერას. ძალიან დიდი შთაბეჭდილებით ვართ იმასთან დაკავშირებით, რომ ვიცეპრეზიდენტმა გამოხატა ძალიან დიდი მოწიწება სიწმინდეების მიმართ, რაც არის დაცული სიონის საკათედრო ტაძარში. კათოლიკოს პატრიარქმა, ნიშნად პატივისცემისა, სტუმარს საჩუქრად გადასცა ოქროს სამაჯური და ასევე გადასცა ქალბატონ პენსს საჩუქრად ოქროს ჯვარი, ცნობილია, როგორც თამარის ჯვარი. კათოლიკოს პატრიარქმა სთხოვა ვიცეპრეზიდნეტს, თუ შეიძლებოდა გადაეცა საჩუქარი აშშ-ის პრეზიდენტის ბატონი დონალდ ტრამპისთვის და ასევე მისი მეუღლის ქალბატონ მელანია ტრამპისთვის. ვიცეპრეზიდენტმა უპასუხა, რომ ის პირადად გადასცემდა პატრიარქის საჩუქრებს ამერიკის შეეთებული შტატების პრეზიდენტს და პირველ ლედის. ეს არის ოქროს სამაჯური და ოქროს ჯვარი”, – განაცხადა პროტოპრესვიტერმა გიორგი ზვიადაძემ.

აშშ-ის ვიცეპრეზიდენტი მაიკ პენსი საქართველოში 31 ივლისს ჩამოვიდა. იგი შეხვდა საქართველოს პრეზიდენტს, პრემიერმინისტრს, ასევე, ოპოზიციის წარმომადგენლებს. მაიკ პენსი საქართველოს დღეს, 1 აგვისტოს დატოვებს.

ნეტგაზეთის მასალების სხვა გამოცემებში გადაბეჭდვის წესი
ავტორი
მიშა მეფარიშვილი არის ნეტგაზეთის რეპორტიორი 2010 წლიდან. აშუქებს კულტურის პოლიტიკის, ადამიანის უფლებების საკითხებს და სხვა მიმდინარე თემებს. Email: mishameparishvili@gmail.com