პარლამენტის სხდომა

88 დეპუტატს არც ერთი კანონპროექტის ინიცირება მოუხდენია

საქართველოს პარლამენტიდან მიღებული ინფორმაციით, არჩევნების შემდეგ, ექვსი თვის განმავლობაში, 88 დეპუტატს არც ერთი კანონპროექტის ინიცირება მოუხდენია. მმართველი გუნდიდან ყველაზე მეტ კანონპროექტის ინიცირებაზე ეკა ბესელია და გედევან ფოფხაძე მუშაობდნენ, ხოლო საპარლამენტო ოპოზიციიდან- რომან გოცირიძე.

ერთ კანონპროექტზე ან კანონპროექტების პაკეტზე საპარლამენტო უმრავლესობის წევრები ხშირად ერთდროულად მუშაობდნენ. არჩევის დღიდან საქართველოს პატრიოტთა ალიანსის დეპუტატებს არც ერთი კანონპროექტის ინიცირება მოუხდენიათ. არც ერთი კანონპროექტის ინიცირება მოუხდენია დამოუკიდებელ დეპუტატ სალომე ზურაბიშვილსაც. მრეწველების წევრი პარლამენტში სიმონ ნოზაძე “ქართული ოცნების” წევრებთან ერთად ერთ პაკეტზე მუშაობდა, რომელშიც ხუთი კანონპროექტი იყო მოქცეული.

ქართული ოცნების ხუთმა დეპუტატმა (ნუკრი ქანთარია, ლერი ხაბელოვი, შოთა ხაბარელი, კობა კობალაძე და კარლო კოპალიანი) არჩევის დღიდან ერთი კანონპროექტის ინიცირებით გამოიჩინეს თავი; „საქართველოს შრომის კოდექსში“ მათ ერთი უქმე დღის “დიდგორობის” დამატება სურდათ, თუმცა “თურქეთის საელჩოს თხოვნით” კანონპროექტი თავადვე შეაჩერეს.

ნეტგაზეთის მასალების სხვა გამოცემებში გადაბეჭდვის წესი
ავტორი
გიორგი დიასამიძე არის ნეტგაზეთის რეპორტიორი 2014 წლიდან. აშუქებს საზოგადოებრივ-პოლიტიკურ საკითხებს და სხვა მიმდინარე მოვლენებს.