გორის ცენტრალურ მოედანს, სადაც ადრე სტალინის 6-მეტრიანი ძეგლი იდგა, შესაძლოა, “ევროპის მოედანი” ეწოდოს. შესაბამისი ინიციატივა გორის საკრებულოს დამოუკიდებელ წევრს, თამარ თედლიაშვილს ეკუთვნის.
თედლიაშვილი ნეტგაზეთთან საუბარში ამბობს, რომ მოედანი დღემდე უსახელოა. “ევროპისკენ სვლა და ევროინტეგრაცია საქართველოს მოქალაქეების არჩევანია. ეს სახელი სწორედ ჩვენს სწრაფვას გაუსვამდა ხაზს”, – ამბობს თედლიაშვილი.
გორის ცენტრალური მოედნიდან სტალინის ძეგლი 2010 წლის 25 ივნისს აიღეს.
2015 წელს საზოგადოების ერთ ჯგუფსა და საკრებულოს წევრების ნაწილს ჰქონდათ ძეგლის აღდგენის მცდელობა, თუმცა უშედეგოდ.
“მე ვფიქრობ, რომ ერთი ადამიანის და თუნდაც ადამიანთა ჯგუფის გადასაწყვეტი არ უნდა იყოს ეს საკითხი. ამაში ალბათ ჩაერთვება საკრებულო, საზოგადოება. ნებისმიერი ქუჩის, მოედნის სახელის ცვლილებას ერთი და ორი ადამიანი არ უნდა წყვეტდეს”, – ამბობს გორის მერი ზურაბ ჯირკველაშვილი ტელეკომპანია “დიასთან” საუბარში.
თედლიაშვილის ინფორმაციით, ინიციატივამ ჯერ საკრებულოს კომისიები უნდა გაიაროს და შემდეგ გაიმართება კენჭისყრა.