“ეს ნიშნავს, რომ „რესპუბლიკელები“ ნარკოდანაშაულისთვის მსჯავრდებული ყველა პატიმრისა და პირობით მსჯავრდებულთა ამნისტიას – სრულ გათავისუფლებას მოითხოვენ, ხოლო გასაღებისთვის მსჯავრდებულთათვის- სასჯელის ერთი მესამედით შემცირებას,” – განმარტავს კორძაია.

კორძაიას თქმით, პროექტის მიზანია, ჰუმანიზმის პრინციპიდან გამომდინარე, ნარკოტიკული დანაშაულისთვის მსჯავრდებულ პატიმართა და პირობით მსჯავრდებულთა მიმართ წლების განმავლობაში არსებული უსამართლო და არაადეკვატური სასჯელების შედეგად მორალური და მატერიალური ზიანის აღმოფხვრისათვის მათი რესოციალიზაციისა და რეაბილიტაციის ხელშეწყობა, ასევე, თვისობრივად ახალი ნარკოპოლიტიკის განხორციელებისა და ამოქმედებისათვის წინაპირობის შექმნა.

„საქართველოს სისხლის სამართლის კოდექსით გათვალისწინებული ნარკოტიკული დანაშაულის ნორმების სიმკაცრე წლების განმავლობაში ცხადყოფდა სახელმწიფოს მხრიდან აღიარებულ ომს ნარკოტიკების წინააღმდეგ, რაც გადაიზარდა ადამიანის უფლებების სრულ უგულებელყოფაში და ადამიანების წინააღმდეგ ომში“,- განაცხადა რესპუბლიკური პარტიის პოლიტიკურმა მდივანმა.

„რესპუბლიკელების“ განცხადებით, ამნისტიის შესახებ კანონპროექტს პარლამენტში დღესვე დაარეგისტრირებენ.