ახალი ამბები

ირაკლი კობახიძე: აფგან მუხთარლის საქმეზე პარლამენტს მთავრობასთან კომუნიკაცია ექნება

1 ივნისი, 2017 • 1926
ირაკლი კობახიძე: აფგან მუხთარლის საქმეზე პარლამენტს მთავრობასთან კომუნიკაცია ექნება

საქართველოს პარლამენტის თავმჯდომარე იმედს გამოთქვამს, რომ აზერბაიჯანელი ჟურნალისტის, აფგან მუხთარლის საქმეზე გამოძიება მალე დასრულდება.

ირაკლი კობახიძის განცხადებით, პარლამენტს ამ საკითხზე აღმასრულებელ ხელისუფლებასთან კომუნიკაცია ექნება.

“ჩვენ სხვადასხვა ვერსია მოვისმინეთ ამასთან დაკავშირებით. მოვისმინეთ აზერბაიჯანული ოფიციალური მხარის ვერსია, ასევე, ადვოკატის ვერსია. გაკეთდა განცხადება აღმასრულებელი ხელისუფლების მხრიდან. ჯერჯერობით, წარიმართება გამოძიება. რა თქმა უნდა, პარლამენტი ჩართული იქნება ამ პროცესში. კერძოდ, გვექნება კომუნიკაცია აღმასრულებელი ხელისუფლების წარმომადგენლებთან და ამის საფუძველზე, იმედი გვაქვს, რომ ნათელი მოეფინება თავიდან ბოლომდე ამ საქმეს”, – განაცხადა საქართველოს პარლამენტის თავმჯდომარემ.

აზერბაიჯანელი აქტივისტი და ჟურნალისტი, აფგან მუხთარლი უკანასკნელად 29 მაისს, დაახლოებით 19:00 საათზე ნახეს თბილისში. ის დაემშვიდობა თავის მეგობარს, ვისაც ბარათაშვილის ქუჩაზე მდებარე კაფეში შეხვდა, დაურეკა მეუღლეს და უთხრა, რომ მალე მივიდოდა სახლში. თუმცა ამის შემდეგ ის აღარავის უნახავს.

აფგან მუხთარლი ამჟამად აზერბაიჯანშია დაკავებული. ადვოკატი ელჩინ სადიგოვი აცხადებს, რომ მუხთარლი თბილისში ჯერ ქართულად მოსაუბრე ადამიანებმა დააკავეს, – “ის ეჭვობს, რომ ეს ადამიანები სახელმწიფოს ძალოვანი სტრუქტურებიდან იყვნენ. შემდეგ აზერბაიჯანელებს გადასცეს, რომლებმაც მას თვალები აუხვიეს, ხელბორკილი დაადეს და სასტიკად სცემეს”.

აზერბაიჯანული მხარის განცხადებით კი, “აფგან მუხთარლი 29 მაისს, 22:40 წუთზე, აზერბაიჯანის საზღვრის სახელმწიფო სამსახურის თანამშრომლებმა ბელაქანის რაიონის ტერიტორიაზე მას შემდეგ დააკავეს, რაც მან უკანონოდ გადაკვეთა აზერბაიჯანის ტერიტორია. მას აზერბაიჯანის სასამართლომ სამი თვით წინასწარი პატიმრობა შეუფარდა. ამის შესახებ ინფორმაციას ჟურნალისტი ჰადიჯა ისმაილი ავრცელებს.

შინაგან საქმეთა მინისტრის, გიორგი მღებრიშვილის განცხადებით, იმის ალბათობა, რომ საქართველოს საზღვრის რომელიმე წერტილი ადამიანმა მესაზღვრის ნებართვის გარეშე გადაკვეთოს, დაბალია, მაგრამ არსებობს. ამის შესახებ მინისტრმა დღეს, 1 ივნისს გამართულ ბრიფინგზე განაცხადა.

მასალების გადაბეჭდვის წესი