ახალი ამბები

“ქულების დაწერას თავი რომ დაანებოთ” – აუტიზმის მქონე ბავშვების მშობლების უშედეგო შეხვედრა მერიაში

19 მაისი, 2017 • 2885
“ქულების დაწერას თავი რომ დაანებოთ” – აუტიზმის მქონე ბავშვების მშობლების უშედეგო შეხვედრა მერიაში

ერთსაათიანი და ხმაურიანი შეხვედრა თბილისის მერიაში უშედეგოდ დასრულდა. აუტიზმის მქონე ბავშვების მშობლები ახლა საკრებულოსთან გეგმავენ მოლაპარაკებას, რათა აუტიზმის მართვის ქვეპროგრამაში, რომელსაც მერია აფინანსებს, ცვლილება არ შევიდეს. თუ საკრებულოც მერიის მხარეს აღმოჩნდება, მშობლები სასამართლოსთვის მიმართვას აპირებენ.

აუტიზმის მქონე ბავშვების მშობლები 18 მაისს, 11:00 საათზე, მერიის წინ შეიკრიბნენ. ისინი პროგრამაში შესატან იმ ცვლილებებს აპროტესტებდნენ, რომლის თანახმადაც, აუტიზმის მართვისთვის საჭირო სეანსების რაოდენობა შემცირდება. კონკრეტულად კი, 7 წლიდან 15 წლამდე პროგრამაში ჩართული ბავშვებისა და მოზარდებისთვის გამოყოფილი იქნება 315 ლარი, რაც ჯამში 15 სეანსისთვისაა საკმარისი. მოქმედი რეგულაციით კი, პროგრამაში ჩართული ყველა ბავშვისთვის 20 სეანსის თანხაა გამოყოფილი და მისი ღირებულება 420 ლარია.

მერიასთან შეკრებილ მშობლებს მერიიდან მალევე გამოეხმაურნენ და ისინი მერის მოადგილეს, ნინა ხატისკაცსა და ჯანდაცვისა და სოციალური მომსახურეობის საქალაქო სამსახურის უფროსს, გელა ჩივიაშვილს შეხვდნენ. შეხვედრას სულ შვიდი მშობელი და ორგანიზაცია “პარტნიორობა ადამიანის უფლებებისთვის” ხელმძღვანელი ანა აბაშიძე ესწრებოდნენ. შეხვედრა მედიისთვის დახურული იყო.

თუმცა, როგორც ორგანიზაციის “პარტნიორობა ადამიანის უფლებებისთვის” მიერ მოწოდებული შეხვედრის ამსახველი ჩანაწერიდან ირკვევა, შეხვედრამ ხმაურით ჩაიარა. “ქულების დაწერას თავი რომ დაანებოთ”- ამ სიტყვებით მიმართა გელა ჩივიაშვილმა მშობლებს.  “შემომთავაზეთ კონკრეტული მეთოდოლოგია თანხის განაწილების. ის, რომ უფლება უნდა იყოს დაცული, ამის ლექცია მე არ მჭირდება. მთავარი ფულის განაწილების მეთოდოლოგიაა”,- ესეც გელა ჩივიაშვილის სიტყვებია.

შეხვედრის შემდეგად გაირკვა, რომ  ცვლილებების მთავარი მიზეზი ლიმიტირებული ბიუჯეტია. გელა ჩივიაშვილმა მშობლებს განუცხადა, რომ ეს იდეა სერვისის პროვაიდერებს ეკუთნით, ანუ მათ, ვინც ამ ბავშვებისთვის ABA თერაპიას ატარებს. ამ ეტაპზე მერია მათ თითოეულ ბავშვზე თითოეულ სეანსში 21 ლარს უხდის. ახლა კი ამ თანხის 19 ლარამდე შემცირება სურს. ხოლო სერვისპროვაიდერები აცხადებენ, რომ 19 ლარად სერვისის მიწოდებას ვერ შეძლებენ, ამიტომ ისეთი სქემა მოიფიქრეს, რომლის მიხედვითაც ეკონომია დაფინანსებულ საათებზე გაკეთდება.

აუტიზმის მქონე ბავშვების მშობლები საპროტესტო აქციებს მერიასთან უკვე თვეებია მართავენ. უკმაყოფილების მთავარი მიზეზი ის დადგენილება იყო, რომლის მიხედვითაც, ამ პროგრამით სარგებლობის უფლება მხოლოდ თბილისში, ისიც 2015 წლის პირველ ივლისამდე რეგისტრირებულ ბავშვებს ჰქონდათ. მშობლები აცხადებდნენ, რომ იმ ბავშვების რაოდენობა, ვინც საჭირო სეანსების დაფინანსებას ვერ იღებს, სულ 36-ია. აქედან უმეტესობა თბილისში დაბადებულია და არა რეგიონიდან გადმოწერილი. თუმცა რეგისტრაციისას წყვეტა ჰქონდათ.

აქციების შემდეგ საკრებულო დათმობაზე წავიდა და ბავშვებმა დაფინანსება მიიღეს. დაგეგმილი ცვლილებების შესახებ ინფორმაციის გავრცელების შემდეგ დაიწყო საუბარი იმის შესახებ, რომ სწორედ ამ ბავშვების ქვეპროგრამაში ჩასმამ გამოიწვია ეკონომიის გაწევის საჭიროება. თუმცა 18 მაისს გამართულ შეხვედრაზე ჩივიაშვილმაც და ხატისკაცმაც აღნიშნეს, რომ სულაც რომ არ დაემატებინათ ბავშვები, ერთი წლის შემდეგ მაინც მოუწევდათ ლიმიტის დაწესება, რადგან ბენეფიციართა რაოდენობა მუდმივად იზრდება.

ორგანიზაციის “პარტნიორობა ადამიანის უფლებებისთვის” ხელმძღვანელი ანა აბაშიძე ამბობს, რომ დაგეგმილი ცვლილებებით სახელმწიფო არღვევს ბავშვის ფუნდამენტურ უფლებას. ასევე უმიზნოდაა დახარჯული ის ფული, რომელიც თუნდაც იმ 15 საათს მოხმარდება, რადგან 15-საათიანი მუშაობა აუტიზმის სამართავად სრულიად არაეფექტურია:

“მერია ფიქრობს, რომ უნდა შემცირდეს ის მინიმალური საათების რაოდენობა, მინიმალურს ხაზგასმით ვამბობ, რადგან საერთაშორისო სტანდარტთან შედარებით ეს არის მინიმუმზე ნაკლები, რაც დღეს არის პროგრამით გათვალისწინებული. მაგრამ ამ გათვალისწინებულის შემცირება პრაქტიკულად ნიშნავს, რომ დარჩენილი საათები მშობელმა უნდა გადაიხადოს, რასაც ვერ გადაიხდის. რადგან ვერ გადაიხდის და დარჩება 15 საათი, ეს ნიშნავს, რომ ABA თერაპია სრულიად არაეფექტური იქნება.. რომ შევაჯამოთ ის 2 მილიონი ლარი, რომელიც ჩადებული ამ პროგრამის დაფინანსებისთვის, პრაქტიკულად იქნება არამიზნობრივი, რადგან 15 საათი ნიშნავს საათების არარსებობას.

თუ ეს ცვლილება საკრებულომ გაითვალისწინა, ეს ნიშნავს, რომ ბავშვის უფლება, მიიღოს ჯანდაცვის, სამედიცინო და სარაბილიტაციო სერვისები, უარესდება. ჩვენ აქ არ ვლაპარაკობთ იმაზე, რომ უფლება, რომელიც დღეს რეალიზდება, არის იდეალური. არა, პირიქით, ჩვენ უნდა ვმუშაობდეთ ამ უფლების პროგრესზე, უფრო მაღალი სტანდარტის შემოტანაზე. დღეს რაც ხდება, ეს არის მინიმალური სტანდრტის გაუარესება. ეს არის ბავშვის ერთ-ერთი ფუნდამენტური უფლების დარღვევა”,- ამბობს ანა აბაშიძე.

მარი კორკოტაძე ერთ-ერთი მშობელია. მისი შვილი 8 წლისაა. თუ საკრებულო ცვლილებებს დაამტკიცებს, მარის შვილი 20 საათის ნაცვლად 15 საათისთვის საჭირო თანხას მიიღებს.

“პირადად მე დავიწყებ შიმშილობას. ამ ამბავს თავს შევაკლავ და და ამას სრული პასუხისმგებლობით ვამბობ. ჩემს შვილს მიზერულს ნუ ართმევს სახელმწიფო. ამის გარდა, მე ჩემი შვილის უამრავი პრობლემა მაქვს მოსაგვარებელი. მაშინ სხვა დანარჩენი მომიგვაროს და მე გადავიხდი ამ 420 ლარს”,- ამბობს მარი კორკოტაძე.

ანა აბაშიძის განცხადებით, მერიაში შეხვედრა იყო მცდელობა, რომელიც უშედეგოდ დასრულდა. მშობლები საკრებულოში გეგმავენ მორიგი შეხვედრის გამართვას. თუ საკრებულოში გამართული შეხვედრაც უშედეგოდ ჩაივლის. მშობლები სასამართლოსთვის მიმართვას აპირებენ.

მასალების გადაბეჭდვის წესი