შეიქმნას ქმედითი შრომის ინსპექცია! არა ბიზნესდიქტატურას! დაიცავით ქალის შრომა! – ამ ლოზუნგებით მშრომელთა სოლიდარობის საერთაშორისო დღეს სხვადასხვა დარგის პროფკავშირებმა, სტუდენტებმა და არასამთავრობო ორგანიზაციებმა თბილისში სამი საპროტესტო აქცია გამართეს.
რატომ არის მნიშვნელოვანი ქმედითი შრომის ინსპექციის შექმნა?
გაერთიანებული პროფკავშირები, არასამთავრობო ორგანიზაციები და სტუდენტური მოძრაობები სახელმწიფოს მრავალი წელია ქვეყანაში შრომითი პირობებისა და მშრომელთა უფლებების გაუმჯობესებისკენ მოუწოდებენ. მათი მთავარი მოთხოვნა, როგორც გასულ წლებში, კვლავ ქმედითი შრომითი ინსპექციის შემქნაა, რომელიც საწარმო დაწესებულებებში დაარეგულირებს შრომასა და კაპიტალის ურთიერთობას, ასევე, დაიცავს დასაქმებულების უსაფრთხოების პირობებს.
გასული წლების საპირველმაისო აქციებზე შედარებით ნაკლებად იყო ქალთა შრომის საკითხებზე საუბარი, დღეს კი ქალთა ორგანიზაციებმა ცალკე გამართეს საპროტესტო აქცია და მათი შრომის დაფასება მოითხოვეს. ქალთა უფლებადამცველი ორგანიზაციების წარმომადგენლები აცხადებენ, რომ ქვეყანას სჭირდება გენდერულად მგრძნობიარე შრომის ისნპექცია, რადგან ქალთა დისკრიმინაცია შრომით ურთიერთობებში ფართოდ გავრცელებულია.
სტუდენტური მოძრაობა აუდიტორია #115–ის წევრები და პროფკავშირების ახალგარდზული მოძრაობის წარმომადგენლები 13:00 საათზე თბილისის სახელმწიფო უნივერსიტეტთან შეიკრიბნენ. პარალელურად სხვადასხვა დარგის პროფკავშირებისა და არასამთავრობო ორგანიზაციების წარმომადგენლები, ასობით სხვადასხვა სფეროში დასაქმებულ ადამიანთან ერთად, ვარდების მოედანზე იკრიბებოდნენ. სტუდენტები პროფკავშირების აქციას 15:00 საათისკენ შეუერთდნენ, რის შემდეგაც ერთად აიღეს გეზი პარლამენტისკენ. საპროტესტო აქციის ბოლოს წაიკითხეს საერთო მანიფესტი, რომელიც პარლამენტის შენობაში დატოვეს.
1 მაისის აღნიშვნა სათავეს 1880–იანი წლების ამერიკის შეერთებული შტატებიდან იღებს. 1886 წელს ჩიკაგოში სამუშაო საათების რვა საათამდე შემცირების მოთხოვნით მშრომელთა მასობრივი დემონსტრაცია მიმდინარეობდა, პოლიცია კი მათ დაშლას ცდილობდა. ისტორიული წყაროების მიხედვით, ერთ–ერთმა დემონსტრანტმა პოლიციელების მიმართულებით დინამიტი ისროლა, რის საპასუხოდაც სამართალდამცველებმა ცეცხლი გახსნეს. ჯამში, ათობით ადამიანი დაიღუპა, მათ შორის იყვნენ პოლიციელებიც. სწორედ ამ მოვლენების შემდეგ დაიწყო მშრომელთა საერთაშორისო დღის აღნიშვნა.