51731

თბილისის ერთ-ერთი ქუჩისთვის გივი ბერიკაშვილის სახელის მინიჭება იგეგმება

“საკრებულოს წინაშე დავაყენებთ ინიციატივას ერთ-ერთი ქუჩისთვის გივი ბერიკაშვილის სახელის მინიჭების შესახებ”, – ამის შესახებ ნათქვამია განცხადებაში, რომელსაც საკრებულოს თავმჯდომარე გიორგი ალიბეგაშვილი ავრცელებს.

,,ინტერესით ვაკვირდებით სოციალურ ქსელში საზოგადოების წარმომადგენელთა მოსაზრებებს თბილისში ერთ-ერთი ქუჩისთვის გივი ბერიკაშვილის სახელის მინიჭებასთან დაკავშირებით. გივი ბერიკაშვილი ნამდვილად არის ის პიროვნება, რომლის შემოქმედება და ღვაწლიც სამაგალითოდ უნდა იყოს დაფასებული და უკვდავყოფილი. ჩვენი და ქართული საზოგადოების მოსაზრებები თბილისის  ერთ-ერთი ქუჩისთვის გივი ბერიკაშვილის სახელის დარქმევასთან დაკავშირებით ერთმანეთს ემთხვევა; აქედან გამომდინარე, გამოვიყენებთ კანონმდებლობით მონიჭებულ უფლებამოსილებას და საკრებულოს წინაშე დავაყენებთ ინიციატივას ერთ-ერთი ქუჩისთვის გივი ბერიკაშვილის სახელის მინიჭების შესახებ. კონკრეტული ქუჩის შერჩევასთან დაკავშირებით  აქტიური კონსულტაციები გაიმართება მსახიობის ოჯახის წევრებთან, სამოქალაქო საზოგადოების, კულტურისა და ხელოვნების წარმომადგენლებთან. კიდევ ერთხელ ვუსამძიმრებთ გარდაცვლილის ოჯახს, მეგობრებს და სრულიად საქართველოს’’, – ნათქვამია ალიბეგაშვილის განცხადებაში.

ნეტგაზეთის მასალების სხვა გამოცემებში გადაბეჭდვის წესი
ავტორი
დათო ქოქოშვილი არის ნეტგაზეთის რეპორტიორი 2013 წლიდან. აშუქებს პოლიტიკის, ადამიანის უფლებების, ევროკავშირის საკითხებს და სხვა მიმდინარე მოვლენებს. Email: davit.qoqoshvili@gmail.com