საქართველოს ენერგეტიკის სამინისტროს ცნობით, ნავთობისა და გაზის სახელმწიფო სააგენტოს, “Vectra Petroleum Limited”-სა და “NauticAwt Energy PTE LTD“-ს შორის შეთანხმება გაფორმდა, რომლის მიხედვით, გურიის და აჭარის რაიონებში ნავთობისა და გაზის ძებნა-ძიებისა და მოპოვებისთვის 30 მლნ აშშ დოლარის ინვესტიცია განხორციელდება.
ხელმოწერის ცერემონიალს მინისტრის მოადგილე მარიამ ვალიშვილი და ნავთობისა და გაზის სახელმწიფო სააგენტოს ხელმძღვანელი გიორგი ტატიშვილი დაესწრნენ.
შეთანხმების მიხედვით, “Vectra Petroleum Limited” და “NauticAwt Energy PTE LTD” გურიის და აჭარის რაიონებში ერთობლივად განახორციელებენ ნავთობისა და გაზის ძებნა-ძიებისა და მოპოვების სამუშაო პროგრამის მესამე ფაზას.
დამტკიცებული გეგმის თანახმად, მომავალი სამი წლის განმავლობაში 30 მლნ აშშ დოლარის ინვესტიცია განხორციელდება. პროგრამის განხორციელებისას დაგეგმილია არსებული მომპოვებელი ინფრასტრუქტურის რეაბილიტაცია, ულტრათანამედროვე ტექნოლოგიების გამოყენებით არსებული მოპოვების გაზრდა და ახალი ღრმა ჭაბურღილების ბურღვა.
“ვექტრა პეტროლეუმ ლიმიტედი” 2011 წელს VIIB სახელშეკრულებო ფართობზე გაფორმებული პროდუქციის წილობრივი განაწილების ხელშეკრულების კონტრაქტორია. ხელმოწერის ბონუსის სახით “ვექტრა პეტროლეუმ ლიმიტედ”-მა 5 მლნ. აშშ დოლარი გადაიხადა, ხოლო დღემდე განხორცილებულმა ინვესტიციებმა 9 მლნ. აშშ დოლარს გადააჭარბა.
“Vectra Petroleum Limited” ჰონგ-კონგში რეგისტრირებულია კომპანიაა, ის ოპერირებს ინდოეთში, ჩეხეთში, საფრანგეთსა და სინგაპურში. “NauticAwt Energy PTE LTD“ დაფუძნებულია სინგაპურში 2011 წელს. კომპანია მიეკუთვნება “NauticAWT Energy Solutions” ჯგუფს, რომელიც წარმოადგენს მაღალტექნოლოგიური აქტივების მქონე კომპანიას და აქტიურადაა ჩართული ნავთობისა და გაზის ინდუსტრიის მონაწილეთათვის ტექნოლოგიური დახმარების აღმოჩენაში,” – აღნიშნულია ენერგეტიკის სამინსიტროს განცხადებაში.
