20 თებერვალს ახალმა პოლიტიკურმა ცენტრმა “გირჩმა” ბრიფინგი გამართა და ჯანდაცვის მინისტრის მოადგილე ზაზა სოფრომაძე და შპს “ფსიქიკური ჯანმრთელობისა და ნარკომანიის პრევენციის ცენტრის” დირექტორი ლაშა კილაძე მონოპოლიზაციის კორუფციული გეგმის შემუშავებაში დაადანაშაულა.

ნეტგაზეთი გავრცელებულ ინფორმაციასთან დაკავშირებით დაუკავშირდა ჯანდაცვის სამინისტროს, სადაც განაცხადეს, რომ ჯერ არ იციან, გააკეთებენ თუ არა კომენტარს. “ნეტგაზეთთან” საუბარში ლაშა კილაძემ ბრალდებებს დეტალურად უპასუხა და განაცხადა, რომ “ბუნებაში არ არსებობს კორუფციული სქემა”.

“გირჩის” განცხადებით, ჯანდაცვის სამინისტროს სოციალური მომსახურების სააგენტო ნარკოტიკებზე მომხმარებელთა მკურნალობისთვის აცხადებს ტენდერს, რომლის შესყიდვის პირობები შედგენილია ისე, რომ მხოლოდ სახელმწიფო შპს „ფსიქიკური ჯანმრთელობისა და ნარკომანიის პრევენციის ცენტრს“ შეუძლია დააკმაყოფილოს შესყიდვის პირობები და გაიმარჯვოს ტენდერში. თუმცა, გირჩის განცხადებითვე, ნარკომანიის პრევენციის ცენტრი თავად ვერ ახერხებს, სრულად მოემსახუროს პაციენტებს და სჭირდება ქვეკონტრაქტორი, რომელიც ბოლო წლების მანძილზე არის შპს “ურანტი”.

გირჩის განცხადებითვე, ნარკომანიის პრევენციის ცენტრი “ იღებს სატენდერო თანხის 83%-ს და მთელი პაციენტების 60%-ს ემსახურება, ხოლო კერძო ქვეკონტრაქტორი ა(ა)იპ იღებს ქვეპროგრამისთვის გამოყოფილი თანხის 17%-ს და პაციენტების 40%-ს ემსახურება.

ამ ინფორმაციას უარყოფს “ფსიქიკური ჯანმრთელობისა და ნარკომანიის პრევენციის ცენტრის” დირექტორი ლაშა კილაძე.

“ეს სიმართლე არ არის, რიცხვები არის არეული. ტენდერში გამარჯვებულს აქვს სრული უფლება, აიყვანოს ქვეკონტრაქტორი მისთვის მისაღები პირობების ფონზე. ცენტრის მიზანი არ არის რომელიმე ქვეკონტრაქტორის გამდიდრება, ცენტრის პრიორიტეტი არის პაციენტი და მასზე ორიენტირებული სერვისები”, – აცხადებს კილაძე.

მან ნეტგაზეთს მიაწოდა 2016 წლის იანვრის და თებერვლის მონაცემები. მაგალითად, იანვრის თვეში, კილაძის ინფორმაციით, მისი ცენტრისა და “ურანტის” მიერ გაწეული ხარჯები ასე გამოიყურება:

გირჩის თქმით, სახელმწიფო შპს პროგრამის შემსყიდველ სააგენტოსთან ერთად მუდმივად ცდილობს, პრობლემები შეუქმნას ქვეკონტრაქტორ “ურანტს” და მათი საბოლოო მიზანია – სახელმწიფო შპს გახდეს ერთადერთი მომსახურების მიმწოდებელი, ანუ მონოპოლისტი.

“ტენდერში არის გამარჯვებული ჩვენი ცენტრი, რადგან ბევრად უფრო სრულყოფილი ინფრასტრუქტურა აქვს, ვიდრე ყველა დანარჩენს, ჩვენ სერვისს ვახორციელებთ საქართველოს 9 ქალაქში, თბილისის გარდა, და გვაქვს 14 განყოფილება. თუ ვინმეს აქვს სურვილი, გახსნას ეს განყოფილებები და იმუშაოს, ჩვენ ამას არ ვეწინააღმდეგებით და ჩემთვის გაურკვეველია, რა სასათბურე პირობებზეა საუბარი. ლეგიტიმური ეჭვი მიჩნდება, რატომ ლობირებს ეს ე.წ. პარტია კონტრაქტორს ასე გააფთრებით?” – აცხადებს ლაშა კილაძე.

გირჩის ცნობით, მონოპოლიას განაპირობებს ის გარემოება, რომ სახელმწიფო შპს-ში დასაქმებული არიან ჯანდაცვის და შინაგან საქმეთა სამინისტროდან დათხოვნილი ყოფილი მაღალჩინოსნები და მათი ოჯახის წევრები. ასეთებად “გირჩის” ჩამოთვლილი ყავს თავად ლაშა კილაძის დედა და ცოლი, ასევე  ასევე ყოფილი თანამდებობის პირებიც ოჯახის წევრები, ყოფილი ძალოვანი უწყების თანამშრომლები და ასე შემდეგ.