„ბლექ სი არენა ჯორჯია“ კონცერტების ჩატარებისთვის საქართველოს ბიუჯეტიდან გამოყოფილი თანხის – 6,5 მილიონი ლარის გამარტივებული შესყიდვით გეგმავს. შესაბამისი წერილით სახელმწიფო კომპანიის დირექტორმა, დიმიტრი ბერიძემ შესყიდვების სააგენტოს უკვე მიმართა, თუმცა წერილში თანხა დაკონკრეტებული არ არის.

„ღონისძიება გეგმად ისახავს საქართველოს მთავრობის მიერ 2016 წელს განხორციელებული პროექტის „Check In Georgia“-ს მიმდინარე წელსაც გაგრძელებას, საქართველოში მსოფლოში აღიარებული ვარსკვლავური და ლეგენდად ქცეული მუსიკალური ჯგუფების, არტისტების, ელექტრონული მუსიკის შემსრულებლების ჩამოყვანას – კონცერტების და მუსიკალური ფესტივალების ჩატარებას“, – აღნიშნულია წერილში.

„ღონისძიებების ჩატარების სავარაუდო პერიოდი დაემთხვევა შავი ზღვის კურორტულ სეზონს გაზაფხულიდან ნოემბრის ბოლომდე“, – აცხადებენ „ბლექ სი არენა ჯორჯია“-ში. კომპანიას ასევე მითითებული აქვს, რომ ჰონორარისთვის [გადასახადების ჩათვლით] სჭირდებათ 4,5 მილიონი ლარი, ხოლო კულტურული ღონისძიებების ორგანიზებისთვის – 2 მილიონი ლარი.

„იმის გათვალისწინებით, რომ არტისტების მიერ დაგეგმილია ევროპისა და მსოფლიო ტურნეები და შემსყიდველი ორგანიზაცია ვერ ჩაერევა ტურნეს კალენდარში და პირობებში, შესყიდვის სპეციფიკიდან და სახელმწიფო შესყიდვების კანონის შესაბამისად, გამარტივებული ელექტრონული ტენდერის ან ელექტრონული ტენდერის საშუალებით შეუძლებელია აღნიშნული კონცერტების ჩატარება/ორგანიზება, აღნიშნული შესყიდვა არ არის დაგეგმვადი“, – აღნიშნულია შესყიდვების ვებგვერდზე.

შეკვეთილში, „Black Sea Arena“-ს საკონცერტო დარბაზში 2017 წლის 20 მაისს დაგეგმილი ამერიკული როკ ჯგუფ „AEROSMITH“-ის კონცერტისთვის კი საქართველოს ბიუჯეტიდან ცალკე 5,5 მილიონი ლარი დაიხარჯება.

შპს „ბლექ სი არენა ჯორჯიას“ ინფორმაციით, ამ თანხიდან 5 მილიონი ლარი ჰონორარია [გადასახადების ჩათვლით], ხოლო ნახევარი მილიონი ლარი კულტურული ღონისძიების ორგანიზებას მოხმარდება.

შესყიდვების სააგენტომ აღნიშნული თანხის გამარტივებული შესყიდვის წესით გამოყენებაზე კომპანიას თანხმობა მიმდინარე წლის 10 იანვარს მისცა.