რესპუბლიკური პარტიის ეროვნულმა კომიტეტმა ახალ პოლიტიკურ მდივნად თამარ კორძაია აირჩია. მანამდე ამ თანამდებობას დავით ბერძენიშვილი იკავებდა, რომელიც დღეიდან პარტიის საარჩევნო-პოლიტიკური ანალიზის მდივნის პოსტს დაიკავებს.
რესპუბლიკური პარტიის წესდების მიხედვით, პოლიტიკური მდივანი თავმჯდომარის შემდეგ პარტიაში მეორე თანამდებობის პირია.
საქართველოს რესპუბლიკური პარტიის ეროვნულმა კომიტეტმა პარტიის აღმასრულებელ სამდივნოში თავმჯდომარის წარდგინებით ახალი წევრი, ინგა მაღრაძე აირჩია. რესპუბლიკელების ცნობით, იგი თვითმმართველობის და რეგიონული პოლიტიკის მიმართულებას უხელმძღვანელებს, ხოლო დავით ბერძენიშვილი საარჩევნო-პოლიტიკური ანალიზის მდივანი გახდა.
რესპუბლიკური პარტიის წესდების მიხედვით, აღმასრულებელი სამდივნოს შემადგენლობას, პარტიის თავმჯდომარის წარდგინებით, ეროვნული კომიტეტი ამტკიცებს. ამჟამად სამდივნოს 7 წევრი ჰყავს. ეროვნული კომიტეტი, რესპუბლიკური პარტიის თავმჯდომარის, ხათუნა სამნიძის ხელმძღვანელობით, განახლებასა და ცვლილებებზე ორი დღე მუშაობდა.